Celebráronse os Campionatos de España Escolares e o Campionato de España Júnior. A miñense María Filgueiras conquistou a medalla de ouro na Contra o Reloxo Individual (CRI) cadete. Outros trece ciclistas competiron nesta xornada defendendo as cores da Selección Galega. A competición tivo lugar na localidade vallisoletana de Zaratán e Galicia pisou o chanzo máis alto do caixón coa corredora miñense. A maiores, a deportista galega foi quinta clasificada na proba de ciclismo en estrada nesta mesma competición.
María Filgueiras rubricou o seu éxito cun tempo de 16 minutos e 22 segundos nun percorrido de 9,8 quilómetros. A representante galega impúxose por 20″ de diferenza respecto a Paula Ostiz (Navarra), gañadora esta campaña de todas as probas da Copa de España, e bateu por 59″ á terceira clasificada Tania Silvente (Murcia).
Logo de recibir o trofeo a corredora María Filgueiras, flamante campioa de España na contrareloxo individual (CRI) declaraba á RFEC: “A verdade é que estou moi contenta co campionato. Non o esperaba para nada, pero é un logro e unha fachenda para min”.
Sobre a mesma distancia, Alejandro Crende terminou décimo terceiro na proba cadete masculina.
Na xornada inaugural dos campionatos escolares tamén se disputaron as ‘cronos’ por equipos (CRE) cadetes. O cuarteto feminino galego, conformado por Lara Fuentes, Xiana Camiña, Lucía Ballester e María Cabot, obtivo a sétima posición no circuíto de 9,8 km e o cuarteto masculino do combinado autonómico, formado por Diego López, Iker Rodríguez, Iván Blanco e Brais Pena, ocupou a décimo segunda praza.
A selección gañadora en cadete feminina na contra o reloxo por equipos foi Euskadi que repite o triunfo colleitado o ano pasado deixando o crono en 16’08’’. Logo delas, quedaron as corredoras da Comunidad Valenciana e as de Castilla y León, con tempos de 16’39’’ e 16’48’’, respectivamente.
Así lles foi ás juniors galegas na CRI e CRE do Campionato de España
Unha vez finalizadas as CRI (Contra o Reloxo Individual) e CRE (Contra o Reloxo por Equipos) cadetes inaugurouse o Campionato de España Júnior póndose en xogo dúas coroas estatais nun trazado de 22,9 km. A contra o reloxo individual feminina resolveuse con Carmen Mallo concluíndo co décimo terceiro mellor rexistro, mentres que Laura Mira asinou o vixésimo primeiro. En canto aos xuvenís masculinos, Sergio Calvo rematou décimo noveno e Ricardo Buba, trixésimo terceiro.
María Filgueiras, quinta na proba de ciclismo en estrada
Seguindo coa participación da ciclista galega María Filgueiras, corredora do Río Miera Meruelo, aínda que adestra habitualmente co Club BTT Caimanes Betanzos, neste Campionato de España Escolar de ciclismo, cabe salientar que na proba de estrada esta deportista vén de rematar en quinta posición.
María Filgueiras, que o día anterior adxudicárase a coroa estatal de contra o reloxo individual, engadiu unha quinta praza a súa actuación en Valladolid. A betanceira meteuse no esprint polo bronce tras un percorrido de 60,4 quilómetros. Do reducido pelotón tamén formou parte Lara Fuentes, anotándose a décimo terceira posición.
Na carreira cadete, de 65 km, o que se decidiu nos metros finais foi o ouro. Os catro corredores de Galicia, décimo terceira por seleccións, chegaron no pelotón. Alejandro Crende, o máis rápido do combinado autonómico, entrou duodécimo, e no mesmo tempo remataron Iker Rodríguez (47º), Iván Blanco (56º) e Diego López (58º).
Con chegadas masivas tamén se resolveron as probas de fondo infantís. Galicia clasificouse sétima por equipos en ambas carreiras. Na feminina, sobre 15 km, Irene Signo e Ivet Ivanova terminaron décimo quinta e décimo sexta, respectivamente, Carme Cabot a 37ª e Alejandra Neira, que sufriu unha caída, presentouse na meta coa súa bicicleta na man e ocupando a 39ª posición.
En cantos ao infantís masculinos, Pedro Liaño concluíu décimo oitavo, dous postos por diante de Anxo Delgado e entre os trinta primeiros tamén estivo Maxime Regozo (27º). Os 16 km de percorrido tamén os completou Unai Fernández (50º).
