A Selección Española de ciclismo (RFEC) tivo acento galego no Campionato de Europa celebrado durante a fin de semana na localidade belga de Namur. A galega María Filgueiras foi a mellor junior española neste Europeo de ciclocróss.
Media ducia de ciclistas de ciclocrós da nosa comunidade defenderon as cores do combinado estatal e nas súas categorías dous deles asinaron os mellores resultados do grupo dirixido polo seleccionador Pascual Momparler. O ponteareán Miguel Rodríguez obtivo a 25ª posición na carreira Sub-23 e a miñense María Filgueiras do @xsmclube, rematou 36ª na proba júnior, segundo informa a Federación Ciclismo Galego.
Ver esta publicación en Instagram
Non faltou a lama na primeira gran cita internacional da temporada. Para Miguel Rodríguez era a súa segunda experiencia nun Europeo e o corredor do Supermercados Froiz completou unha actuación moi regular. Dende o inicio moveuse nos postos intermedios entre os 51 participantes sub23 e nesa zona da clasificación se mantivo ata cruzar a liña de meta a 5:11 do gañador Emiel Vestrynge (Bélxica). O de Ponteareas superou aos seus tres compañeiros de selección: Gonzalo Inguanzo (33º), Raúl Mira (44º) e Javier Zaera (48º).
O sábado tamén competiron as juniors, categoría na que o 75% do combinado estatal era galego. María Filgueiras, no seu debut con España, entrou na liña de meta 36ª a 5:57 de Lauren Molengraaf (Países Baixos), que superou no esprint pola vitoria á italiana Valentina Corvi.
Tres postos por detrás da miñense concluíu a Aroa Otero, na súa primeira experiencia internacional, a continuación da porriñesa chegou a vasca Nahia Arana e a ponteareá Uxía Soto, lastrada por un contratempo mecánico, ocupou a 43ª posición.
O Campionato de Europa, evento que no 2024 terá como escenario Pontevedra, baixou o pano o domingo con dous galegos en acción. Na súa estrea coa selección española o júnior carballés Tomás Pombo finalizou 37º, a 3:44 do vencedor Léo Bisiaux (Francia), e segundo mellor xuvenil do quinteto hispano formado por Carlos Gámez (32º), Hodei Muñoz (46º), David Ivars (49º) e Emilio Reinoso (52º). Pola súa banda, á porriñesa Laura Mira correspondeulle o 32º posto na carreira Sub-23.
A comunidade que máis ciclistas aportou foi a galega
Galicia, con seis representantes, foi a comunidade autónoma cunha presenza máis numerosa na expedición española composta por 17 corredoras/es de ciclocróss. Euskadi contou con catro, a Comunidade Valenciana con tres e un corredor aportaron Cantabria, Catalunya, Aragón e a Comunidade de Madrid.
Máis información e clasificacións do Europeo de Ciclocross de Namur
