María Eraunzetamurgil: “Miguel Ángel Ortega foi o causante para dar o paso de vir a Ensino e saír da miña zona de confort”

María Eraunzetamurgil comparecía diante dos medios de comunicación. Con tan só 23 anos recentemente cumpridos, María xogará a súa oitava tempada na LF Endesa, a primeira coa camiseta do Durán Maquinaria Ensino tras unha vida ligada a IDK Guipuzkoa.

A nova alero do conxunto lucense confesou na súa presentación que, “o principal motivo para vir a Lugo foi a chamada de Miguel Ángel Ortega, co que coincidín en distintas seleccións e se que co chego a un equipo en crecemento e co que poderei crecer tamén a nivel individual”.

Con máis dunha semana de adestramentos, a valoración é moi positiva, “somos un equipo que dará moita guerra, traballamos para conseguir o que o adestrador quere de nós e estou segura de que, con traballo, conseguiremos ser un equipo moi competitivo”.

Asegurou María Eraunzetamurgil, que “ao adestrar cun plantel de tanta calidade deime conta de que teño que mellorar moitos aspectos, tanto en defensa como en ataque, pero para iso estamos aquí”.

En plena pretemporada, e co reto europeo no horizonte, María Eraunzetamurgil recoñece que, “A verdade é que aínda non coñecemos moito do noso rival, o Campobassa italiano. Agora mesmo estamos a asimilar conceptos e xa teremos tempo de pensar neste encontro e rival”.

Manuel Durán, presidente do Durán Maquinaria Ensino Lugo recoñeceu que “tras as renovacións, a fichaxe de María Eraunzetamurgil foi a primeira petición do adestrador. Sabemos que é unha xogadora cunha gran proxección pero tamén cun gran presente que seguro que nos axuda a seguir crecendo desde xa”.

Para Miguel Ángel Ortega, o novo adestrador do cadro lucense, María Eraunzetamurgil era unha prioridade na confección da plantilla. “Coñézoa ben e llo que é capaz de dar. Está entre as mellores xogadoras nacionais na súa idade. É unha xogadora moi física tanto en ataque como en defensa e estou encantado de que poida estar connosco neste novo proxecto”, explicaba aos medios.