- “Teño un sabor agridoce (do Open de España) porque a marca é moi boa, pero non serviu para clasificarme”
- “Faime ilusión ir ao meu primeiro europeo de piscina, pero teño que decidirme porque coincide coa planificación para o Preolímpico”
Unha lesión e unha pandemia non foron suficientes para truncar a carreira de María de Valdés, unha das mellores nadadoras de España. A deportista do CN Liceo, natural de Fuengirola, proclamouse recentemente campioa de España en 1.500 m. en piscina, e ten as portas abertas a competir en Toquio 2021 na modalidade de augas abertas.
O ouro e a prata do Open estatal celebrado a pasada semana engádese a grandes resultados como a Copa do Mundo disputada en Doha (Qatar), onde De Valdés rematou undécima, a sete segundos da campioa. A próxima data marcada no calendario: o Preolímpico de augas abertas do 29 e 30 de maio.
María de Valdés proclámase campioa española en 1.500 m. e obtén a mínima olímpica
Estes son só algúns dos éxitos máis destacados dunha tempada na que a andaluza, como ela mesma admite, está no seu mellor momento. Cos seus números, a nadadora María de Valdés móvese como pez na auga (nunca mellor dito) entre nomes da talla de Mireia Belmonte e Jimena Pérez.
– As Nosas: Vés de lograr o ouro no Open de España de piscina, pero sendo un trunfo agridoce ao non conseguir a marca para os Xogos Olímpicos. Como te sintes?
María de Valdés: Por unha parte estou contenta, pero pola outra o que dis, teño un sabor agridoce porque a marca é moi boa e rebaixei a mínima, pero non serviu para clasificarme. Un pouco chof por esa parte, pero tamén dame pé a seguir adestrando forte para clasificarme para os 10.000 m de augas abertas.
AN: De todas formas, segues tendo opcións de estar en Toquio e estas pasan polo Preolímpico de augas abertas.
MV: Si, exacto. Tería que quedar como a primeira española e entre as dez primeiras europeas.
AN: Pero esta proba coincide preto do Europeo de piscina, compaxinarás os dous campionatos ou irás só a un deles?
MV: A cousa é esa. Faime ilusión ir ao meu primeiro europeo de piscina, pero teño que decidir porque coincide coa planificación para o Preolímpico de augas abertas. Entón, o plantexamento que temos é ir a tope con augas abertas, centrarme niso e a ver se sae a xogada que temos.
María de Valdés: “O plantexamento que temos é ir a tope con augas abertas, centrarme niso e a ver se sae a xogada que temos”
AN: O debut no Europeo terá que agardar.
MV: Si, este ano á piscina é 100% seguro que non vou, pero ao mellor vou ao de augas abertas. Aínda non temos nada claro, porque estamos vendo como me beneficia a planificación, se ir ao europeo de augas abertas ou non ir e centrarme nos adestramentos de cara ao Preolímpico. Entón estamos así, así a ver que facemos.
AN: Existe moita diferenza entre preparar un campionato de piscina e un de augas abertas?
MV: Non hai moita diferenza. O campión do mundo de piscina en 1.500 é campión de augas abertas. Realmente non se trata de preparar algo moi especifico para augas abertas, sempre se pode preparar en base a piscina e augas abertas, un pouco de todo. Só que tes que facer moita variación de adestramento, de tema de aeróbico e extensión de metros, pero non preparamos especificamente tal proba.
AN: Volvendo a poñer a vista no Preolímpico, tras ser a española mellor clasificada en Doha, chegas en gran estado de forma
MV: A verdade é que si, estou agora mesmo na miña mellor forma física e mental. Estou contenta a pesar do que pasara neste campionato, pero agora teño que coller forzas para terminar a tempada no meu mellor estado de forma e a ver que tal.
AN: Tes botado o ollo a outras rivais, ou prefires centrarte en ti mesma para o Preolímpico?
MV: A min gústame centrame máis en min e fixarme non na posición, senón en sempre quedar o máis preto posible da cabeza de grupo. Se non, métome a min mesma moita presión e iso ao final non vai conmigo. Hai xente á que lle vai ben ter presión, pero a min supérame un pouco. Trabálloo coa psicóloga e tal, pero é un dos puntos que peor levo. De cara ás competicións internacionais sempre intento facelo o mellor posible e quedar co grupo de diante, coas mellores do mundo.
María de Valdés: “Hai xente á que lle vai ben ter presión, pero a min supérame un pouco. Trabálloo coa psicóloga”
AN: Comentas que traballas cunha psicóloga, como preparas a nivel mental competicións deste nivel?
MV: Agora estou cunha psicóloga que leva conmigo desde a corentena que se chama Andrea e grazas a ela estou onde estou agora. Grazas ao meu adestrador e a ela vaime xenial. Preparamos todo o tema de carreiras, no día a día os adestramentos, como asimilar a presión e todo un pouco.
AN: Empezaches xusto na corentena, influíuche moito a pandemia?
MV: Si, a verdade é que si. Á metade do confinamento paseino un pouco mal. A raíz de aí a Federación axudoume a atopar a unha e con esta moza estou super contenta. Estamos traballando os catro xuntos, os dous adestradores que teño, Jesús e Alonso, a psicóloga e máis eu. Estamos os catro moi unidos e a min xérame máis tranquilidade e forza para seguir adiante.
AN: Pero a pandemia tamén pode ter aspectos positivos. Beneficiouche o aprazamento dos Xogos Olímpicos?
MV: En parte si, porque é un ano máis que teño de madurez e para fortalecerme mental e fisicamente. Como tiven unha lesión de ombreiro, o ano pasado tiven unha pequena recaída e grazas ao confinamento puiden fortalecelo e agora mismo estou bastante ben.
María de Valdés: “O ano pasado tiven unha pequena recaída e grazas ao confinamento puiden fortalecelo”
AN: Precisamente a lesión da que falas sucedeu no 2016. Desde entón xa estás recuperada e ao teu máximo nivel.
MV: Si. Traballeino moito, tamén o pasei bastantante mal, pero a día de hoxe podo dicir que estou recuperada non ao 100%, pero a un 90% si, grazas aos fisios e ao traballo no día a día e ao traballo de ximnasio.
AN: Nesas datas foi a túa chegada ao CN Liceo
MV: Cando vin xa tivera a operación e estiven en recuperación. Manqueime en Andalucía e alí fixen a recuperación, e sempre que vou trátanme, e aí recupereime de todo. Pero ás veces teño recaídas, polo tema de ximnasio, ou algo que faga mal. De momento a cousa vai ben.
AN: Como foi a túa chegada a Galicia?
MV: Ofrecéronme unha beca na Coruña, no Liceo, e para min o feito de saír de casa con 18 anos era un dar un paso máis. Dixen, bueno, vou probalo e se vai ben seguirei e se non, sei que podo volver a Fuengirola, á miña casa. Ao final iso deume o paso de ter unha beca e saír profesionalmente.
A primeira saída de casa sempre é difícil, pero ao final vas sendo forte cando saes. Botas de menos á túa familia, pero sabes ao que ves, a crecer como deportista e ao final se os resultados están saíndo, pois faise máis ameno.
AN: Desde logo, esta tempada os resultados acompañan. Máis aló das marcas, que probas destacarías deste curso a nivel persoal?
MV: Esta mesma, o Open de España, que creo que foi o campionato que mellor me saiu e co que mellor me encontrei fisicamente. E tamén en Doha, na Copa do mundo, que tiven os mellores resultados augas abertas e saín moi reforzada anímicamente.
María de Valdés: “Poder competir a nivel internacional e nacional é un privilexio”
AN: Supoño que está a ser unha tempada diferente pola COVID-19, como o levas neste sentido?
MV: Foi difícil, pero ao final o poder competir a nivel internacional e nacional é un privilexio para nós. Tivemos sorte no ámbito da natación e saíu todo para diante e non vivimos ningunha baixa nin nada.
