Mari Paz acaba de entrar na historia do Valencia despois do gol do pasado sábado ante o Espanyol. A dianteira galega non para de derrubar barreiras e romper rexistros. Co golazo de volea que deu o empate ao ches, sumou 130 dianas e superou a dous grandes iconos valencianistas como goleadora histórica do club. Adiantou a unha lenda como David Villa e igualou a toda unha institución como Mario Alberto Kempes, o matador.
Desde a súa chegada o 26 de xuño de 2013 ao conxunto valencianista, a de Villagarcía de Arousa leva 130 goles en tan só 189 partidos. Un rexisto ao alcande de moi poucos. O propio guaje Villa necesitou 225 partidos oficiais para marcar 129 goles e Kempes, 216.
Nacida para o gol
Co seu gol ante o equipo periquito, esta tempada marcou 7 tantos que a converten na máxima anotadora do equipo. Lonxe está esa cifra de 31 goles que realizou na tempada 2016/17, pero a súa importancia no equipo segue sendo do mesmo calibre desde que chegou. O gol che ten acento galego.
Palmarés de lenda
Mari Paz, que o vindeiro 1 de febreiro cumpre 32 anos, é unha das xogadoras máis laureadas do fútbol feminino español. Comezou a xogar no Atlético Arousana da súa terra natal. Desde alí puxo rumbo en 2006 cara o mediterráneo pero ainda non era o tempo de recalar no seu amado Valencia. Fichou polo Levante, equipo no que militou dous anos, ata o 2008. Barcelona e Espanyol foron os seus seguintes equipos antes de recalar na entidade che.
A galega non para de sumar fitos a súa carreira. Con tres Copas da Raíña e unha Primeira Iberdrola na súa palmarés, agora é un récord o que engade no seu haber. Ademais, a xogadora foi internacional por España en categorías inferiores e na absoluta, chegando a disputar partidos clasificatorios e a Eurocopa de 2017 en Holanda e sumando 8 partidos e marcando un total de 11 goles coa Roja.
