“Ainda non teño decidido o meu novo destino” declarou a dianteira galega Mari Paz Vilas para As Nosas sobre o seu futuro tras anunciar o pasado xoves a súa saída do club che.
A arousá é todo un referente para a familia valencianista desde que recalou nas filas do Valencia no ano 2013. 130 goles despois e superando a lendas como o Guaje Villa e Mario Kempes, a xogadora de Bamio pon punto e final a unha unión que deixa á galega como máxima goleadora histórica do club valenciano.
https://twitter.com/maripaz_vilas/status/1266072271766138884
O club che non dubidou en mostrar un agradecemento especial por unha xogadora que foi unha gran referencia pola súa achega goleadora e polo seu liderado sobre o campo. Mari Paz leva o gol na sangue, onde xa na súa Vilagarcía natal, sendo xogadora de base do Arousa e militando no Atlético Arousana levaba o gol como sinal de identidade. Despois chegarían os seus pasos por equipos como o FC Barcelona, Levante e Espanyol, ademais de converterse en internacional coa Selección Española.
Récord co Valencia e coa Roja
A killer ten o récord de goles nun partido coa Selección Española no que anotou a friorenta cifra de 7 tantos nun mesmo encontro. Ademais, a actual xogadora che xogou varios clasificatorios, o Europeo Absoluto e a Cyprus Cup que logrou levantar coa Roja.
Volver a casa
Varios equipos da Liga Iberdrola mostraron o seu interés en facerse cos servizos da dianteira galega, pero polo momento, Mari Paz non ten decido o seu futuro. Volver a Galicia e a súa casa para xogar no Deportivo ABANCA? Unha posibilidade pero non a única que ten Vilas sobre a mesa.
