A internacional Antía Chamosa da Sociedad Gimnástica de Pontevedra será a principal atracción do Campionato de Galicia de Marcha en Ruta que se desenvolverá esta fin de semana polas rúas do Concello da Pobra do Caramiñal.
A marchadora internacional tomará a saída este sábado as 18.30 horas sobre a proba dos 10 km na que parte como indiscutible favorita. Lembramos que na actualidade é a vixente campioa de España nos 10.000 m nesta proba. Tamén está seleccionada para tomar parte o vindeiro día 16 de maio no Campionato de Europa por equipos na modalidade dos 35 km que se desenvolverá en Polonia.
A internacional Carmen Escaríz, quen volve a alta competición xunto a súa compañeira de club Raquel Fernández e Mar Chillón do A.F. Celta, estarán na loita polas medallas desta categoría.
Nos homes, Daniel Chamosa que como a súa irmá compite coa disciplina da Sociedad Gimnástica de Pontevedra preséntase como favorito ao título autonómico, malia que diante del terá ao máster internacional Juan Manuel Morales do Marineda, quen xa se impuxera no campionato de pista do ano pasado.
Carmen Jueguen defende o título en máster F-45
A maiores estarán boa parte das campioas galegas da edición 2020. Destacan Aldara Meilán da Atlética Lucense na Sub16 e Sabela Castelo do Vila de Cangas na Sub-14. Tamén participarán Ismael Díaz do Club Atletismo Sada na categoría Sub-20, Brais Suárez do RunGalicia-interSport na Sub-18 e Tomás Bautista do At. Porriño na Sub-12.
Na categoría máster Carmen Jueguen, de A Silva, defenderá o seu título na categoría F-45. A maiores, a campioa e subcampión de España máster deste ano en Sevilla sobre os 20 km ruta Emilia Rodríguez do Trega na categoría F-40. Outro atleta que tomará parte é Manuel Polo, do Atletismo Narón, que participará na categoría M-45. Todas e todos eles estarán presentes sobre o trazado do concello pobrense.
A Marcha en Ruta retransmitirase en directo
O campionato, que dará comezo o sábado ás 17.00 horas, poderá desfrutarse vía online. A Marcha en Ruta será retransmitida en directo a través da canle youtube da Federación Galega de Atletismo.
Revive aquí a presentación do Campionato de Galicia de Marcha en ruta
