- María del Mar Delgado González, do Club Tríatlon Ferrol, repetiu como vencedora absoluta feminina do XIV Duatlón de Reis de Vimianzo, sendo esta a sexta ocasión na que cruza a meta primeira nesta proba que xa constitúe toda unha referencia no calendario deportivo do Nadal na Costa da Morte.
Os fortes ventos e a intensa chuvia non foron obstáculo para as máis de 200 persoas que se deron cita na mañá de onte, domingo 9 de xaneiro de 2023, no XIV Duatlón de Reis de Vimianzo.
A proba, que xa se consolida como unha das citas deportivas máis importantes da Costa da Morte e da provincia da Coruña, volveu coroar a María del Mar Delgado González (Club Tríatlon Ferrol) como gañadora absoluta da categoría feminina neste XIV Duatlón de Reis de Vimianzo, mentres que Manuel Piñeiro López (Cidade de Lugo Fluvial) acadou o primeiro posto na masculina.
Manuel Piñeiro López chegou á liña de meta nun tempo de 01:31:32, conseguindo ser campión desta cita deportiva por terceira vez. María del Mar Delgado González, pola súa banda, revalida o título por sexta vez ao conseguir, este ano, a primeira posición cunha marca de 02:01:54. Ademais, ambos os dous deportistas foron coroados como campión e campioa galegos xa que esta edición do XIV Duatlón de Reis de Vimianzo tamén foi Campionato Galego de duatlón cross.
O Duatlón de Reis de Vimanzo engadiu categorías mozas
Por outra banda, este ano celebrouse un circuíto mozo para as categorías cadete, xuvenil e júnior na distancia supersprint. Na cadete masculina sobresaíu Raúl Naveira Filgueiras (independente por un día) e na feminina Mariña Esmorís Varela (A. Polideportiva San Ramón de Vilalba).
Na categoría xuvenil deste Duatlón de Reis de Vimianzo acadaron o primeiro posto Anxo Bello Rodríguez (A.D. Fogar) e Lucía Piñón Pereira (A.D. Náutico de Narón); mentres que no ámbito júnior destacou Rubén Otero Losada (A.D. Fogar) na modalidade masculina e Ainoa Gontán Iglesias (Tríatlon Inforhouse Santiago) na feminina.
No apartado de remudas, puntuable para o circuíto galego, Damián Novoa Rodríguez e José Ramón Villanueva Sabucedo (Codigobike) conseguiron o mellor tempo con 01:34:18 na categoría masculina, mentres que na mixta destacaron Alberto Gómez Vila e Noemi Pena Carbón (Atosteam) con 01:51:30.
Por último, entregouse un recoñecemento a Gabriel Castiñeira Pais (Tríatlon Costa da Morte) por quedar primeiro na categoría local e cuarto na proba xeral.
Ao remate da proba, desde o Concello de Vimianzo mostráronse moi orgullosos desta nova edición xa que “o tempo non acompañaba nada pero a xente non se amedrentou e repetimos un novo éxito”.
