O SG Pontevedra anuncia cambios no seu club. O equipo pontevedrés terá a nenas e nenos nados entre o 2009 e o 2014 nas categorías sub10, sub12 e sub14 das escolas do club, que pasan terán como novo director a Manuel Hurtado.
Segundo informan desde a entidade, Hurtado leva vinculado á Sociedad Gimnástica de Pontevedra desde hai seis anos e tamén é atleta do club. No seu haber conta cun “gran palmarés deportivo e profesional”.
Como alteta, o novo director das escolas foi subcampión de España de Maratón Absoluto no 2019. Como adestrador, leva unha década dirixindo aos Franciscanos de Lugo e atletas da Atlética Lucense.
Así mesmo, Manuel Hurtado é adestrador nacional de atletismo de nivel III e graduado en Educación Primaria, especializado en inglés e educación física. Tamén conta co máster de alto rendemento deportivo do Comité Olímpico Español (COE).
Prazas limitadas nas escolas da SG Pontevedra
Os adestramentos das escolas darán comezo o 15 de setembro nas Pistas do CGTD de Pontevedra e terán lugar os luns, mércores e venres en diferentes horarios. As xornadas empezarán ás 17:00 ata as 18:00 cos máis pequenos e de 18:00 a 19:15 os sub12 e sub14.
As prazas da canteira do SG Pontevedra son limitadas e as inscricións abren o vindeiro 23 de agosto. Pecharán o 10 de setembro. Debido á pandemia, o club pedirá ás atletas que asinen unha declaración responsable e que cumpran o protocolo.
