Despois de rematar a tempada 2020/2021 en sétima posición e disputando a Copa da Raíña e os play-offs, o conxunto do Durán Maquinaria Ensino apunta agora a Europa. Para logralo, a clave do plantel do próximo curso estará en xogadoras de proxección. Así polo menos o adiantaba desde a directiva
“Estamos apostando por un por un perfil de xogadora xove”, explica o seu presidente, Manuel Durán, como Alba Prieto ou Helena Oma. En plena formación do plantel que competirá a seguinte tempada, o club lucense ten a vista posta en “internacionais con España ou outro país”.
O grupo de xogadoras xoves estará compensado por baloncestistas de maior experiencia, “que van axudar a non ter toda a presión sobre elas”. “Imos ter un mix”, especifica o presidente Manuel Durán.
Manuel Durán presidente do Durán Maquinaria Ensino: “Buscamos a xente que queira medrar con nós”
Non é a primeira vez que no Durán Maquinaria Ensino xogadoras prometedoras dan forma á súa carreira. O presidente recorda nomes como Gimeno ou Stanacev, dúas xogadoras que fixeron algúns dos seus mellores números coa camiseta do club lucense. “Buscamos a xente que queira medrar con nós”, apunta.
O maior límite para a confección deste plantel é o orzamento, pero Manuel Durán subliña que “se hai que facer un esforzo para dar un paso máis, se fai”.
O Durán Maquinaria Ensino soña con chegar a Europa
“Agora mesmo, a Liga española é a máis potente de Europa”, asegura o presidente Manuel Durán. Para o presidente “é moi importante non perder a visión do que somos, porque non temos ese orzamento para chegar a ese tipo de xogadoras. Pero estamos nun grupo medio, cos vascos e un par máis, que si todo vai ben, poderemos seguir mellorando na zona nobre”.
Manuel Durán: “Estamos nun grupo medio, cos vascos e un par máis, que si todo vai ben, poderemos seguir mellorando na zona nobre”
Para que o Durán Maquinaria Ensino se meta na Eurocup, é moi importante realizar as fichaxes adecuadas. “Hai xogadoras que virían encantadas pero o problema é que non xoguemos a competición europea. Estamos moi cerquita, este ano o Valencia ten praza en Euroliga e é probable que teñamos catro prazas en Eurocup, pero todo isto é un tema que non podemos levar sós. Precisamos ás administracións e algún patrocinador máis”, engade.
Polo de agora, a posibilidade de ver ás lucenses en Europa é aínda unha incógnita, xa que depende da FIBA, aínda que Durán se mostra optimista: “Hai tres de Euroliga, Girona, Salamanca e Valencia, e creo que para Eurocup hai nivel para 4-5 equipos sen problema”.
Ortega ten un ollo posto na canteira
A previsión para a tempada 2021/2022 é a de ter un plantel de once ou doce xogadoras, tendo en conta o reparto de minutos de xogo. “Co ritmo co que collan con Miguel Ángel Ortega, moitos minutos non poden estar en cancha porque esixe bastante”.
Ortega: “Creo que podo dar un impulso máis a un club en crecemento”
O novo adestrador estará pendente tamén da canteira lucense. Na súa presentación, Ortega asegurou que “ter grandes xogadoras locais impulsa e atrae á masa, á afección. Ter á heroína local é magnífico”.
Miguel Ángel Ortega: “Ter grandes xogadoras locais impulsa e atrae á masa, á afección”
Para conseguilo, o técnico estará moi pendente dos equipos da base do Ensino, tanto para o futuro do club como para que “tamén o perciban as nenas. Pois este club ten un ollo en nós, non somos un ente á parte, somos parte importante do club”, remata.
