As Guerreiras Laranxas son as actuais tricampioas da máxima categoría do fútbol sala feminino español. Ostentan arestora os vixentes títulos de Liga, Copa e Supercopa. O seu presidente, Manuel Blanco Fanego, está orgulloso dos méritos das futbolistas do Pescados Rubén Burela e dos galardóns que as deportistas que entrena Julio Delgado están conseguindo para a entidade da Mariña.
“Positivo” balance deportivo do 2020 de Manuel Blanco
O presidente do Pescados Rubén Burela, Manuel Blanco Fanego, considera que o balance do ano 2020 “foi bastante positivo, xa que gañamos todos os títulos co equipo feminino. Co masculino estabamos loitando por non descender pero, como nos chegou a pandemia, ao final quedamos en Primeira División”.
O mellor de 2020, “os títulos” e o peor:”a pandemia mudounos a forma de vida”
No que atinxe á consecución de méritos deportivos, o 2020 non pode considerarse un mal ano para o Pescados Rubén Burela. Moi a o contrario xa que as Guerreiras Laranxas foron campioas. Por iso o seu presidente, Manuel Blanco defende que o “mellor de 2020 foron os grandes títulos que participamos co equipo feminino e incluso masculino, deixou unha sensación de que estabamos loitando por un posto de Primeira División. En canto ás categorías de base, e todo o club, fixemos o traballo para que se vaia afianzando pouquiño a pouquiño todo o que son as escolas deportivas”.
“O peor está claro que foi esta pandemia que nos chegou a todos, que nos fixo cambiar a todo o mundo a forma de vida, o que é o deporte en xeral. Tivemos que adaptarnos ás circunstancias da mellor maneira posible”, explica o presidente laranxa.
Que pide o equipo ao 2021?: “Saúde e traballo para todos”
Vivir unha pandemia mundial fai que o desexo de saúde se repita en moitas das persoas entrevistadas para esta reportaxe de aniversario de As Nosas. Tamén Manuel Blanco Fanego, apunta a ese asunto na súa lista de desexos: “Para este 2021 pídolle, sobre todo, saúde para todos para que poidamos seguir competindo, que o equipo feminino poida seguir gañando títulos e o equipo masculino, asentarse na categoría de primeira división. En canto ás escolas, con todo isto estamos intentado traballar da mellor forma para que, na mellor forma posible, os que vaian iniciarse agora poidan competir, pero estamos nunha situación difícil para todos. Pídolle saúde e poder seguir traballando todos”.
