O Dépor ABANCA afronta durante a tarde de Reis un partido moi complicado en terras de Valencia. É certo que o equipo che non está pasando unha boa racha a nivel de resultados, pero tamén é certo que sempre adoitan ser un conxunto duro e intenso.
Manu Sánchez manifestou na sala de prensa da Cidade Deportiva de Abegondo que o Valencia CF Feminino, rival do Deportivo ABANCA o luns 6 de xaneiro no Estadio Antonio Puchades de Valencia (18:30 horas), é un equipo “imprevisible”.
Manu Sánchez, adestrador do Deportivo ABANCA: “O Valencia é un equipo que me gusta moito, con moitísimas variantes, moitísimo nivel en todos os postos”.
O adestrador galego alabou ao conxunto valencián durante a previa: “Tiveron diferentes baixas aínda que para os equipos de arriba as baixas teñen que ser menos escusa que para os equipos con menos medios. É un equipo que me gusta moito, con moitísimas variantes, moitísimo nivel en todos os postos. Van seguir un pouco a liña de traballo dos últimos partidos. Aínda que non lles deu bos resultados, van axustando. Esperamos un partido complicado”.
Manu Sánchez considera que o parón de Nadal viralles “mellor ao Valencia que a nós”. Segundo explicaba: “nós vimos dunha liña de xogo e seguridade nalgunhas facetas, mentres que elas, ao contrario, veñen dunha racha negativa de resultados. É un gran equipo, dos chamados a estar arriba. Esperamos un partido complicado. A ver se podemos sacar algo de alí”, advirte o adestrador herculino.
Asegura que o equipo deportivista chega a este cruce co que se retoma a competición ligueira “confiado porque adestramos moito todos estes días”. De feito, Manu advertía: “Teño ás xogadoras rabiosas por adestrar o fin de ano, Aninovo e todo… Espero que o pague o Valencia, que non o pague eu”, apuntaba o míster a xeito de brincadeira.
Polo que atinxe ás baixas por lesión de cara a afrontar este encontro, o adestrador do Dépor ABANCA indicaba aos xornalista en sala de prensa que nestes días xa se teñen incorporado ao traballo as futbolistas Silvia Mérida e Patri Díaz, mentre que aínda serían baixa para Valencia: Miriam Ríos e a cancerbeira María Miralles.
Manu, contento cos reforzos invernais do Dépor
Para este mercado de inverno, Manu Sánchez apunta que agora mesmo “somos un club atractivo para as xogadoras. A xente xa sabe como funcionamos, como traballamos, coñece Abegondo, a Cidade Deportiva. Penso que nos axudou nas incorporacións de Carolina e Lorena. A proxección que está a ter todo o que estamos a facer vai máis aló de España. Son xogadoras importantes no seu país que coñecen e valoran o que estamos a facer aquí”. Precisamente ao respecto desas últimas fichaxes o técnico branquiazul apuntaba: “contamos que cheguen para a semana que ven”.
Manu Sánchez, adestrador do Deportivo ABANCA: “Non pechamos portas. Nunca se sabe o que pode aparecer”.
Non agarda en principio máis incorporacións aínda que asegura: “non pechamos as portas. Nunca se sabe o que pode aparecer pero en principio estamos contentos”.
Consultado sobre o balanzo que fai dos resultados acadados polo Dépor ABANCA no que vai consumido de competición, o adestrador galego admite que: “Non contabamos con todo isto ao comezo da campaña”. Pero matiza que finalmente “o traballo deu os seus froitos”. De cara ao futuro apunta que agora “hai que tentar gozar e prolongar este estado de ánimo e futbolístico”.
O novo Consello de Administración traslada tranquilidade
Ademais, o adetrador deportvista detallou que nestes días se mantivo unha reunión co novo Consello de Administración do RC Deportivo que serviu para que este transmitise “tranquilidade, que sigamos co día a día e que o futuro, o horizonte, é bo; que as mozas estean tranquilas, que o corpo técnico siga traballando igual, que todo se vai solucionar”.
