O Dépor ABANCA viaxa ata o País Vasco para disputar unha nova xornada de Liga Iberdrola contra a Real Sociedad. Un equipo de altura e que rara vez concede puntos na casa. Pero isto non amedrenta ás galegas, que acuden á cita conscientes de que “son tres puntos vitais que temos que pelexar”, en palabras de Manu Sánchez.
O adestrador recoñece o talento rival, nun equipo que leva varias tempadas competindo duramente, “apostando polas xogadoras xoves, cun xogo alegre e ofensivo, atrevido”.
Por estes motivos, Manu Sánchez considera que as claves do partido estarán en aproveitar as debilidades das vascas, estando “concentradas nas axudas, tapando ben os espazos, xogando ben e entendendo as transicións”.
As deportivistas xogan lonxe de Abegondo
Desta vez o Dépor ABANCA non terá os folgos da súa afección para empurralas á vitoria, pero isto non preocupa “en exceso” ao club herculino. “O equipo xa está acostumado do ano pasado á presencia de xente aquí, que era moi numerosa, como á presencia de público nos campos rivais, que tamén era moi numeroso”, explica o técnico.
Manu Sánchez: “Esas persoas (na bancada) fixéronse notar e creceron con nós no partido”
Porén, si recoñece que no útlimo partido en Abegondo “esas persoas fixéronse notar e creceron con nós no partido”. Por iso, Sánchez quixo expresar o seu agradecemento a parte da afección que foi a velas nun partido entre semana e cun horario complicado. “Alentounos moito”, sinala.
Sen descanso desde a vitoria contra o Sporting de Huelva
O seguinte duelo para as deportivistas chega case sen descanso, pero iso é algo ao que o plantel do Dépor ABANCA xa comeza a estar acostumado.
Manu Sánchez: “Imos con toda a ilusión do mundo a Donosti”
Nas filas coruñesas non pensan no cansancio e o seu adestrador asegura que “o afrontamos co bo ánimo despois do bo resultado do mércores, que nos engancha aínda á pelexa. Imos con toda a ilusión do mundo a Donosti”.
Ademais, este partido preséntase dunha maneira distinta ao xogado contra o Sporting de Huelva. Na última cita primou o corazón, pero para esta tense que priorizar a cabeza.
Así o entende Sánchez, quen asegura que no “moi disputado” partido de entre semana “o que nos levou á vitoria foi o corazón das xogadoras, a fe que tiñan no que estaban facendo e a ilusión por saír desta situación”.
Pero esta actitude por si mesma non chega para tumbar á Real Sociedad. Contra as vascas é necesario “ser intelixentes, administrar ben as opcións con balón que teñamos porque é un equipo moi ben posicionado, moi escalonado no campo, que apenas deixa espazos e liñas para poder progresar”.
Un gol que vale un mundo e deixa ao Dépor a un trunfo da salvación
A progresión de Eva Dios
Na rolda de prensa Manu Sánchez tamén analizou a evolución da canterana Eva Dios. A xoven xogadora está a vivir un gran momento deportivo, formando parte das convocatorias do primeiro equipo e sendo seleccionada polo combinado estatal.
Manu Sánchez: “Ténse que amoldar e nós temos que encargarnos de axudala”
Neste sentido, o seu técnico recorda que hai que “ter calma e tranquilidade con este tipo de xogadoras, que veñen desde moi abaixo e que acaban de chegar ao Dépor”.
Co aumento do nivel competitivo aumenta a dureza dos adestramentos, polo que Eva Dios “ténse que amoldar e prepararse mentalmente para todas as situacións. Nós temos que encargarnos de axudala para que todo isto non lle trastoque e non entenda mal nin os por ques, nin os tempos”.
En liñas xerais, Sánchez afirma que fai unha valoración moi positiva da galega e da súa actuación no último partido. “Quizáis lle custou un pouco entrar no que necesitabamos no xogo, pero unha vez o conseguiu quedamos moi contentos. Traballou moito sen balón”, declarou. No mesmo sentido, subliña que “ten que ir a máis e nós temos que darlle ese tempo para que asuma todo isto”.
Así ve Manu Sánchez á exdeportivista Nuria Rábano
Para esta ocasión non só competirán contra un rival complicado, senón que o farán contra unha excompañeria. Nuria Rábano milita desde esta tempada vestida coa camiseta da Real Sociedad.
Apesar de non poder contar xa con ela, Manu Sánchez asegurou que no club coruñés se alegran por ela. “Creo que está contenta, desfrutando do estilo de xogo do equipo de de Nalia (a adestradora rival)”, recoñece. A isto engade que desde o seu punto de vista a xogadora galega aínda ten “marxe de mellora e aspectos por pulir e moito que dar”.
Manu Sánchez: “Aínda non se veu á mellor Nuria que vimos aquí e nese sentido creo que na Real son uns privilexiados”
“Creo que aínda non se veu á mellor Nuria que vimos aquí e nese sentido creo que na Real son uns privilexiados por contar con unha futbolista como ela”, declarou o seu ex adestrador.
