Aínda que Manu Sánchez rexeitaba hai uns días chamarlles finais aos partidos que restan a Dépor ABANCA nesta tempada 2020 -2021, o que non nega o adestrador é que todos os encontros que o club branquiazul ten por diante de aquí ao final de Liga son “importantes”
Así, o adestrador das galegas manifestou hoxe, sábado 13 de febreiro, na sala de prensa de Abegondo en rolda de prensa virtual, que o partido de mañá domingo 14 de febreiro en Abegondo ante o Real Betis (13:30 horas, Gol), “é un partido importante como vai ser o seguinte, e o seguinte, e o seguinte. O noso obxectivo é conseguir o tres puntos e seguir o que parece unha boa liña de crecemento”, explicaba o adestrador coruñés.
Pese aos últimos resultados, das galegas, alentadores, o preparador do Dépor ABANCA non se confía e sabe que as posibilidades de acadar a permanencia son certas pero pasan por gañar.
Ante o Real Betis Féminas, Manu Sánchez agarda un partido “competido, aberto, polas nosas ideas e as que está a tentar transmitir Juan Carlos Amorós (técnico bético). Despois do gran traballo de Pier (anterior adestrador das verdibrancas) está pincelando e modelando o persoal ao seu gusto, converténdose nun equipo moito máis eficaz”.
Advirte o adestrador deportivista que as béticas “son perigosas porque veñen nun bo momento cun bo resultado ante o Sporting Huelva e un bo partido ante o FC Barcelona. Hai que estar atentos. A ver como está a climatoloxía. Pero penso que será un partido aberto de poder a poder”.
A situación do Dépor ABANCA, na zona baixa da táboa, non é a única sorpresiva desta Liga Iberdrola 2020 – 2021. Precisamente, sobre este próximo rival, Manu Sánchez apuntaba que “no inicio da tempada ninguén pensaba que estivese aquí abaixo connosco. É un plantel espectacular. Está a sufrir o que eu vaticinaba en pretemporada, que a Primeira Iberdrola ía dar un xiro esta tempada. E así é”.
O partido coa UD Granadilla, un punto de inflexión, di Manu Sánchez
A pregunta dunha das xornalistas presentes na rolda de prensa, Manu Sánchez confirmaba que tras o partido ante a UD Granadilla Tenerife a principios de 2021 o equipo tivo unha especie de punto de inflexión. Explicaba que se lle deu “un volantazo á situación; incidir e traballar máis a fondo a condición física, que é moi importante para levar a cabo os partidos da forma que queremos que leven. Elas aceptárono de bo grado. Custou e está a custar. Están a facer un esforzo grande e hai que agradecerllo”.
Preguntado sobre que lles traladou a nova directiva deportivista encabezada por Antonio Couceiro na súa visita ao vestiario de As Nosas deportivistas esta semana, Manu Sánchez sinalaba que aínda están “instalándose no club. A min, persoamente, transmitíronme unha enerxía diferente, moi positiva. Espero que iso se vaia contaxiándose a todo o club. Transmitiron tranquilidade, moito ánimo e confianza”.
