O Dépor ABANCA despedía o 2020 en Abegondo, ante un FC Barcelona intratable e que logrou unha vitoria moi abultada, cun 1-6 no marcador. Con todo, o adestrador branquiazul Manu Sánchez entende que “un partido como este non pode levarnos ás vacacións de Nadal con mal sabor de boca. O equipo vén en liña ascendente”.
A defensa branquiazul non foi quen de frear totalmente ás imparables culés, pero non foi o equipo que máis goles recibiu de parte das blaugranas. Ademais, as galegas loitaron por cada balón ata o último momento do partido e mesmo lograron anotar un tanto.
Noutros momentos ese gol podería considerarse unicamente o chamado “gol da honra” pero diante do Barça esta tempada é moito máis. Até o momento, logo de que as catalás leven xa disputados nove partidos, só dous equipos esta tempada foron quen de perforar a súa portaría. Paños non é nada doada de bater. So a Real Sociedade e o RC Deportivo ABANCA acadaron ese mérito.
Manu Sánchez, preparador do Dépor ABANCA: “Un partido como este non pode levarnos ás vacacións de Nadal con mal sabor de boca. O equipo vén en liña ascendente”
Por estes motivos, Sánchez ve moitas notas positivas do que foi o último encontro dun ano cheo de altibaixos. O técnico lévase “sobre todo o nivel solidario do equipo, traballando absolutamente todas, sen perder nunca de vista a portería rival. Aínda que é complicado, despois de estar moito tempo correndo detrás do balón acertar cando tes a pelota”.
O Dépor ABANCA xa era consciente da dificultade do partido, polo que os obxectivos pasaban por facer un partido digno e facer o gol da honra. Ambas, metas conseguidas.
Unha das artífices do gol, non do remate pero si da xogada que o propiciu, foi Athenea del Castillo. O técnico explicaba en rolda de prensa que tiña un acordo con ela para que a futbolista, que leva varios partidos con molestias acumuladas, xogase parte do mesmo. Así foi. A cántabra estivo unha hora sobre o terreo de xogo e protagonizou accións moi relevantes. Estos días de descanso serviranlle para recuperarse das molestias.
Un 2020 de claros e escuros para Manu Sánchez
Desde logo, para as herculinas o ano non rematou como empezara. “A nivel deportivo o iniciamos espectacular. Xa levabamos esa traxectoria con momentos inolvidables como o partido de Copa contra o Barça o ano pasado ou a remontada contra o Madrid. Houbo momentos que non esqueceremos”, recordaba o adestrador.
Manu Sánchez: “Houbo momentos que non esqueceremos”
Con todo, non se pode dicir o mesmo desta tempada 2020/2021. “Non fun capaz de sacarlle o xugo como eu quixera e estamos facendo cousas nas que eu non creo moito. Preveo un inicio de 2021 duro e para pelexar, pero é para o que estamos”, confesa Manu Sánchez.
Pero un dos cambios que máis afecta ao plantel é a falta das siareiras na bancada, “esas mil e pico persoas que tiñamos cada partido e que non poidemos desfrutalas”.
Por todo isto e pola situación excpecional deste 2020, de cara o novo ano, Sánchez pide primeiro saúde. “O importante é que sexamos capaces de superar, xa non médicamente, senón como sociedade isto da mellor maneira posible. Os meus mellores desexos son para o club, que consiga os obxectivos, que son claros, e tirar para diante”, declaraba o adestrador branquiazul.
Manu Sánchez, adestrador do RC Deportivo ABANCA: “O importante é que sexamos capaces de superar, xa non médicamente, senón como sociedade isto da mellor maneira posible”
Tamén quixo recordar ao doutor Barral, “que sempre se preocupa por nós polo tema de saúde e agora o temos lesionado”. Manu Sánchez rematou a súa última intervención do ano desexando un feliz Nadal e que “a volta sexa con mellores noticias branquiazuis para todos”.
Manu Sánchez, entrenador do Dépor ABANCA: “Os meus mellores desexos son para o club, que consiga os obxectivos, que son claros, e tirar para diante”
