O Dépor ABANCA loita por manter a categoría e terá que poñer toda a carne no asador para facelo. Matematicamente é posible. So catro puntos as separan dese obxectivo. Manu Sánchez asegura que “o equipo non está tan mal como parece”. El di apartarse de “todos os cálculos” e as cábalas que farían que o equipo coruñés mantivese o seu lugar na Liga Iberdrola. Pero o adestrador blanquiazul tamén admite que “as xogadoras nas súas cabezas están coas súas calculadoras”.
Se algo bota en falta o Dépor ABANCA este ano é o alento da bancada. Cando un equipo está necesitado de confianza e de empuxe nalgún momento do partido, o apoio das seareiras é fundamental. Se cadra por iso hoxe, Manu Sánchez, lamentaba na sala de prensa de Abegondo que As Nosas deportivistas non poidan contar con afección animando ao equipo.
“Notamos a ausencia da xente”, di en referencia á afección
O adestrador deportivista explicaba que para as futbolistas branquiazuis “era fundamental. Xa desde o ano do ascenso creouse unha comuñón entre o equipo e a afección, cun ambiente especial e diferente aquí en Abegondo. Estamos a notar a ausencia da xente”.
Matizaba o técnico coruñés que “non é ningunha escusa dos resultados do equipo pero si que é algo que tanto as xogadoras, como nós mesmos ou os rivais destacan. Esa forza que tiñamos desde a bancada desapareceu e nótase moito. É unha mágoa que non podamos estar nós con #ANOSAFORZA xuntos neste camiño. É un obstáculo máis que temos que saltar”.
O partido desta nova xornada da Liga Iberdrola xogarse mañá, domingo 31 de xaneiro, ás 18:30 horas na Cidade Deportiva de Abegondo. Alí, o Deportivo ABANCA recibirá, a porta pechada por mor das restriccións que leva aparellada a situación sanitaria, ao Levante UD.
“Custa reverter a situación estando abaixo”, admite o adestrador
O técnico deportivista, que leva catro partidos sen gañar, cre que “o equipo está ben. A serie positiva cortouse co partido do FC Barcelona, que eu creo que sacamos cousas moi positivas. Despois en Tenerife fixemos un desastre de partido e trouxemos unha derrota máis que merecida. Pero a semana pasada en Valencia creo que non é un partido para vir cun 3-0. Máxime vendo que tivemos ocasións suficientes para pornos diante no inicio do partido. Creo que o equipo estivo moi ben, entrou moi ben, fixo unha gran primeira parte. Logo ao final eses pequenos detalles que marcan o final de cada partido penalizáronnos”.
Asegura Manu Sánchez que “elas son conscientes do que fixemos alí. O equipo non está tan mal como parece pero si que é certo que nesta liga tan competida hai equipos que fan moi ben as cousas e non conseguen sacar os partidos adiante. Estar aí abaixo custa para reverter a situación. Pero eu estou moi contento con esta semana de traballo, vinas moi ben. Temos que tentalo mañá, con todas as da lei e tentar facer valer Abegondo”.
Manu Sánchez non quere botar contas
A catro puntos da salvación aínda que con tres partidos menos, Manu Sánchez confesa que “eu tento apartarme de todos os cálculos. O que temos diante mañá é o Levante UD. Procuro non facer contas da leiteira. Contamos con disputar todos os partidos desta competición e é o que temos que facer. Hai un determinado número de puntos que temos que lograr para a salvación. É o que imos tentar”.
É consciente o adestrador coruñés que “as xogadoras nas súas cabezas están coas súas calculadoras. Nese sentido son todas de ciencias puras. Eu tento apartarme e mentalizalas de que o importante é o que temos por diante. E agora é o Levante UD. Xa pensaremos no que teremos máis adiante. Imos pelexar todos os puntos que temos en xogo e non discriminar en función de rivais, situacións e xornadas aprazadas”.
O Levante UD, un equipo moi versátil dirixido por María Pry
Do rival, o Levante UD, lembrou Manu Sánchez que vén de derrotar ao poderoso Atlético de Madrid con claridade (3-0): “Foron moi superioras e plasmouse todo o traballo de María Pry (adestradora): as ideas que hai, toda a versatilidade que lle dá este equipo que ten”.
Finalmente, Manu Sánchez desexou nos últimos días de mercado, “ter a sorte de recibir algunha axuda para afrontar o que resta de campionato. Non temos problema de calidade, pero si de cantidade. A ver se podemos con isto compensar todo”.