O Dépor ABANCA xógase a vida esta fin de semana, na que disputa as súas escasas posibilidades de salvación ante un Real Betis mellor posicionado. Con pé e medio na Reto Iberdrola, o equipo de Manu Sánchez vai a por todas. “Non temos nada que perder”, insiste o adestrador.
O duelo deste sábado ás 11:00 horas pode determinar o futuro do equipo branquiazul. As coruñesas están a cinco puntos da salvación, con seis en xogo, nunha barreira marcada polo Betis, o rival desta xornada.
Cambio de actitude no Dépor ABANCA
Unha final, aínda que non para as deportivistas. “Este equipo leva xogando finais practicamente dous meses. Nós non o entendemos así, o corpo técnico e o equipo o temos claro, en certa maneira, que se me entenda o que digo, o equipo descendeu hai dúas semanas”, sentencia o adestrador en referencia ao último encontro en Abegondo.
Nesa xornada, o Dépor ABANCA empatou ante o Granadilla, sumando un punto practicamente inservible. En palabras de Manu Sánchez, “o partido contra o Granadilla era o partido clave e a nosa oportunidade de ter na nosa man a salvación”. Finalmente, co desenvolvemento da xornada noutros campos, as táboas serviron para que as coruñesas cheguen con vida á penúltima xornada competitiva.
Manu Sánchez: “O que tiñamos que perder xa o perdimos”
Con oportunidades (escasas) de lograr a milagre da permanencia, o vestiario herculino prefire afrontar o encontro con outro chip: “A nosa mentalidade é que imos xogar un partido no que non temos nada que perder. O que tiñamos que perder xa o perdimos. O equipo xa sufriu, xa chorou, xa sangrou por todo o que fixo durante todo o ano e creo que podemos ter a cabeza moi alta por chegar a esta situación cando todo o mundo nos daba por descendidas en novembro”.
O Dépor ABANCA é o único equipo que estivo toda a tempada en postos de descenso pero, a falta de dúas xornadas, aínda teñen posibilidades. Con moito que gañar, pero nada que perder, o equipo de Sánchez convértese nun rival “máis perigoso”.
O propio adestrador destaca que co resultado ante o Granadilla o equipo soubo “o que é sufrir e eu teño claro que iso non o quero volver a ver. Aquí hai un aprecio e un cariño persoal a xogadoras que levan moito tempo con nós e que nos deron moito e creo que todos o sufrimos con elas. Incluso a xente na bancada agradecía ese esforzo e “despedía” ao equipo da categoría”.
Manu Sánchez: “Hai xogadoras que sen esa presión poden multiplicar o seu rendemento”
Con este resultado, o equipo desprendeuse dun lastre, así que o vindeiro encontro chega “sen presión. A presión xa esfumouse hai dúas semanas. Non temos nada que perder. O que tiñamos que perder xa o perdimos e a nosa mentalidade é diferente, convértenos nun equipo máis perigoso. Hai xogadoras que sen esa presión poden multiplicar o seu rendemento e imos ver se somos capaces de enfocar ben o partido”.
Partido lonxe de Abegondo ante un rival con moito en xogo
O duelo desta fin de semana desenvolverase lonxe da calor da afección deportivista. O propio Manu Sánchez recoñéce que é unha desvantaxe, xa que o apoio “é un valor insustituible”. Para enfrontar este partido, o Dépor ABANCA ten diversos plans para intentar a superar a un rival “que a priori o ten todo de cara”.
O Betis está fóra de postos de descenso, ten cinco puntos máis que as galegas e o goal average a favor. Con todo isto, Sánchez indica como tamén é preciso “saber levar este tipo de situacións”, xa que as andaluzas estiveron preto de celebrar unha permanencia aínda non asegurada.
Manu Sánchez: “Este partido é un partido de barro”
“Creo que nós demostramos que sabemos sobrevivir no barro, vivimos no barro e este partido é un partido de barro. Imos ver quen é capaz de levar o gato á auga. A priori elas teñen todas as papeletas para solventar a situación mañá mesmo, pero imos ver que nos atopamos”, engade o adestrador.
Un proxecto de futuro
O incerto futuro do Dépor ABANCA non impide o movemento dentro do club cara a vindeira tempada. Manu Sánchez admite que “os tempos do fútbol xa van moi avanzados. Agora estamos poderíase dicir no treito final do mercado. A estas alturas case todo o mundo ten decidido ou encamiñado o que vai facer a próxima tempada e iso ocorre tamén aquí. As xogadoras, os axentes, os entornos, todo o mundo está a tocar a porta, é normal”.
Malia os malos resultados do equipo ao longo deste curso, non son poucas as ofertas que recibiron. “Aquí chama moita xente ás portas, algo bo teremos. Polo mesmo lado, hai moita xente que, se o resultado é o descenso, ten en moita consideración quedar aquí. Iso fala ben do proxecto, de toda a xente que hai ao redor do proxecto, de como se trata desde o club o proxecto feminino”, explica o técnico. Aínda así, as prioridades están claras e o primeiro na mente das deportivistas é o partido do sábado.
Sánchez non dubida que o equipo seguirá a diante en primeira ou en segunda, e asegura que “o club é moi atractivo para unha futbolista. Poder dicir que vas xogar e adestrar todos o ano en herba natural é algo que pouca xente pode dicir, os servizos médicos que temos no club, con todos os respectos, creo que non se atopan en ningún lado”, sinala.
Manu Sánchez: “Ímonos centrar en desfrutar, aínda que soe así, desfrutar do partido de mañá como equipo e veremos se podemos desfrutar aínda máis no partido de aquí”
O adestrador confirma que desde a dirección deportiva levan traballando distintos escenarios desde hai meses, pero haberá que agardar para poñelos en marcha. “Os caprichos deste deporte queren que cheguemos á penúltima xornada sen saber que vai ocorrer e sobre todo nunha tempada tan atípica como esta. Imos rematar a finais de xuño, con pouco tempo de reacción. Ímonos centrar en desfrutar, aínda que soe así, desfrutar do partido de mañá como equipo e veremos se podemos desfrutar aínda máis no partido de aquí”, remata.
