O Dépor ABANCA de Manu Sánchez non sumou os tres puntos ante o Real Madrid en Abegondo, pero pode presumir de plantarlle cara a un dos equipos máis complicados da Liga Iberdrola.
As madrileñas, coas exdeportivistas Tere Abelleira e Misa nas súas filas, tiveron que poñer unha marcha extra para levarse o encontro, no que as branquiazuis loitaron desde o primeiro minuto.
“Creo que hai que facer unha análise moi positiva. Non podo estar máis orgulloso do que fixo o equipo, a afección así o demostrou, e creo que lle prantamos cara e fumos valientes desde o minuto 1”, comentaba o adestrador en rolda de prensa, alabando ás súas xogadoras.
O técnico entende que ante un conxunto da talla do Real Madrid, o rival “en pequenos detalles pódeche dar unha unha acción de claridade para romper o partido. Intentamolo e non puido ser. Só queda felicitar ás xogadoras polo que fixeron hoxe”, decalraba Manu Sánchez.
A análise do técnico branquiazul
Para o adestrador do Dépor ABANCA, a primeira parte do encontro foi “primorosa no aspecto táctico que plantexamos e executaron moi ben”. O conxunto galego foi quen de obrigar ás madrileñas a recorrer aos balóns longos, anulando o seu xogo interior e facendo dano nas contras.
Porén, o resultado final (0-2) non foi satisfactorio, polo que Manu Sánchez entende que as súas futbolistas poden non procesar ben o que sucedeu no campo. Para el, as sensacións obtidas en Abegondo teñen que ser “unha válvula para ventilar e crer que ante un equipo como o Madrid podemos facer isto, e hai que pensar no seguinte”.
O cambio de sistema non foi suficiente para rematar as accións
Para este partido, Sánchez optou por cambiar o debuxo das pasadas xornadas e xogar cunha soa punta, algo ao que as deportivistas non están moi acostumadas. Malia non chegar a facer dano ao Real Madrid, o técnico considera que “non se pode reprochar nada” ás branquiazuis.
“Hoxe era moi importante para nós, queriamos desactivasen o mediocampo e o xogo interior do Real Madrid e o conseguimos perfectamente, porque xa no minuto 20, o banco rival estaba pedindo balóns longos. Penso que iso é moi meritorio para un equipo coma nós”, reflexionaba. Tamén quixo sinalar o bo traballo de dúas xogadoras, Eva Dios e Cris, que arriscaron e foron valentes en todo momento, polo que o seu adestrador está “moi contento co traballo delas dous e con todas. Non podo poñer un pero a ningunha xogadora”, aseguraba.
Segundo Sánchez, o único que faltou por definir no partido foi a profundidade nos metros finais, “porque estabamos a provocar erros no rival e a recuperar ben. Ese tan falado último pase e última decisión”. Con todo, o adestrador considera que as dificultades vividas no partido non deixaron opcións para acertar cara a porta, pero As Nosas loitaron “ata o último minuto no campo rival”.
Primeira vermella a Manu Sánchez en 10 anos
A parte máis negativa do encontro chegaría no tramo final, coa expulsión de Manu Sánchez. O técnico viu a tarxeta vermella por protestar unha acción de Cardona, polo que a colexiada Verónica González procedía a expulsalo do campo.
En rolda de prensa, o adestrador branquiazul pediu desculpas á afección, equipo e trío arbitral, e incide en que protestou “sen faltar o respeto a ninguén e sen insultos”.
Agora, este “karma” dos adestradores perxudicará a Manu Sánchez cara a próxima xornada, xa que non poderá estar no banco dando indicacións. Ao final, resume o incidente en “cousas que pasan”, xa que esta é a súa primeira tarxeta vermella en dez anos, polo que ten que “pedir disculpas a todo o mundo”.
