Este martes, 22 de decembro, ás 14:00 horas, o Dépor ABANCA pecha o ano 2020 en Abegondo recibindo ao FC Barcelona, actual líder invicto da Primeira Iberdrola.
Este será todo un reto para as branquiazuis adestradas por Manu Sánchez. Cun mal inicio de tempada, as herculinas comezan a retomar as boas sensacións e acadaron unha racha de tres partidos sen perder nas últimas tres xornadas. En parte grazas a un cambio na actitude e na mentalidade do equipo que queren manter ante a seguinte proba que teñen por diante.
Un novo Dépor
“Intentaremos sufrilas o menos posible e coa mentalidade de tentar dar a sorpresa. Esa mentalidade foi a que nos levou o ano pasado a estar a piques de conseguilo en Copa e é o que temos que pensar. Non podemos saír derrotadas ao partido. Temos que crer nas nosas posibilidades e penso que as imos ter”, subliña convencido Manu Sánchez.
Partido a partido e semana a semana as modificacións na maneira de xogar vanse asentando no conxunto e permitíronlle ás coruñesas sumar 7 dos últimos 9 puntos posibles. “Estamos cambiando moitas cousas. Eu teño que cambiar moitas cousas nas que nunca crin realmente como adestrador, pero que sei que teño que facelas polo ben do equipo e nese mismo proceso están as xogadoras”, indica o técnico deportivista en rolda de prensa.
Manu Sánchez: “Estou moi contento co esforzo das xogadoras, o sacrificio, o crer e o cambio mental que estamos tendo”
Un exemplo deste cambio mental estivo no partido da anterior xornada, contra o Madrd CF. O Dépor ABANCA conseguiu o empate no último minuto. “Fixemos ocasións suficientes para empatar o partido. O equipo non deixou de crer e, cando marcas no minuto 92, pero previamente nos sete minutos anteriores tiveches catro ocasións moi claras de gol, significa que non foi unha xogada aillada. Estou moi contento co esforzo das xogadoras, o sacrificio, o crer e o punto e o cambio mental que estamos tendo”, salienta o adestrador.
Para a próxima cita, continúa esa mentalidade loitadora. Pero Sánchez non quere facer comparacións coa última vez que se afrontaron ás azulgranas, na Copa da Raíña da tempada pasada, cando o Barça, “o mellor plantel de Europa”, logrou a vitoria sufrindo ata o último minuto.
Para o adestrador, este ano ambos son equipos novos, así que prevén o encontro “segundo as sensacións que teño agora de como está o equipo e como estamos funcionando. Non nos podemos fiar de como foi o partido do ano pasado, porque a dinámica é diferente, o equipo é diferente e as rutinas de funcionamento tamén son diferentes”, resume.
Manu Sánchez: ” Non nos podemos fiar de como foi o partido do ano pasado, porque a dinámica é diferente, o equipo é diferente e as rutinas de funcionamento tamén son diferentes”
Sullastres e Kenni seguen de baixa
Para este encontro seguirán fóra da convocatoria por baixa Sullastres e Kenni. A porteira segue cunha lesión no ombro e o equipo médico atende a súa evolución semana a semana. Sánchez comentou na rolda de prensa que agarda que para a volta de Nadal xa poidan contar con ela.
Pola súa banda, Kenni está aínda superando as molestias musculares, polo que o adestrador non a quere forzar para o último partido do ano. O resto do plantel está listo para o partido, aínda que fatigadas por ter xogado o sábado.
Este será ademais o último partido de Lía coa camisola branquiazul. A futbolista deixa o equipo en xaneiro, pero se leva consigo as palabras de cariño de Manu Sánchez. “É unha nena que comezou con nós cando arrancou o proxecto. É unha marabilla tela con nós nos vestiarios, nas viaxes. É unha futbolista que se fai querer. Aportounos moito e axudounos moito e deséxolle o mellor. O Dépor sempre será a súa casa e as portas estarán abertas”, declarou.
Manu Sánchez (sobre a marcha de Lía): ” O Dépor sempre será a súa casa e as portas estarán abertas“
Ante a posibilidade de que no mercado de inverno cheguen reforzos, o técnico coruñés indicou que serían necesarios, pero o club aínda está traballando nelo.
Última ocasión de puntuar antes do Nadal
Unha vitoria sería vital para escapar dos últimos catro postos da táboa clasificatoria. Despois dos bos resultados acadados nas últimas xornadas, “conseguimos que con estas vitorias as xogadoras crean” e están a tres puntos de fuxir do pozo. “Estás en posicións de descenso pero a un tiro de pedra de saír e iso nos ten que dar confianza, e tranquilidade medida, para afrontar o que vén e ver que estará na nosa man pelexar”, apunta o adestrador.
Despois desta cita, o Dépor ABANCA estará de vacacións ata o 30 de decembro. Unha pausa que podería frear o ritmo que está a coller o conxunto pero, en palabras do seu técnico, “non está de máis que as xogadoras paren un pouco, que respiremos e empecemos a pensar que á volta de vacacións temos un periplo de partidos moi intensos e importanets”. Pero primeiro, a loitar ante o Barcelona.
