O Dépor ABANCA de Manu Sánchez está a ter un inicio de Liga Iberdrola complicado. Despois de seis xornadas e cero puntos, o adestrador das branquiazuis fai unha análise negativa da mala situación do equipo: “Non é normal que nestes primeiros seis partidos non acadásemos ningún punto. Penso que estamos a arrastrar distintos factores que non teñen que ser ningunha escusa, como poden ser as baixas ou mecanismos interiorizados que non están a funcionar”.
O técnico intentou darlle a volta ao encontro contra o Sevilla FC, perdido no tempo de desconto, facendo algunhas modificacións no centro do campo, coa intención de “ter o control do partido e do balón”. Un partido que o adestrador considera que tería que ter rematado en empate, xa que “nalgúns momentos estivemos nós mellor e noutros o Sevilla logrou imporse, con ocasións para ambos equipos”.
Manu Sánchez, adestrador do Dépor ABANCA: “Non gañamos nada lamentándonos e laiándonos do errado. Hai que seguir cara diante e arranxar os erros que podamos ter cometido para non cometelos no futuro”
Isto non foi suficiente para puntuar, pero o adestrador ten claro que “non gañamos nada lamentándonos e laiándonos do errado. Hai que seguir cara diante e arranxar os erros que podamos ter cometido neste partido para non cometelos no futuro”.
Sánchez: “As xogadoras está moi responsabilizadas”
Con todo, o técnico branquiazul confía no traballo das futbolistas, das que asegura que están plenamente comprometidas co clube. En relación ás sensacións que tiveron ao rematar o partido, Manu Sánchez recoñece que “as xogadoras acabaron moi mal. Son xogadoras que senten moito o equipo e o clube. Senten moito todo o que fan e era un día especial en Riazor, coa oportunidade de reverter a situación, e elas o padecen máis que ninguén. Tamén é motivo de orgullo ver como as xogadoras na sexta xornada están así, porque iso quere dicir que están moi responsabilizadas co que esta sucedendo”.
Manu Sánchez, adestrador do Dépor ABANCA: “Non imos deixar que isto caia e ese é o principal aspecto ao que temos que aferrarnos, o traballo diario. As futbolistas traballan sen descanso, con ganas e con ilusión. O resto son aspectos que temos que ir modificando, acertando cos mecanismos e xogadoras idóneas para cada partido e todo iso é o que nos vai sacar de aquí. O temos claro”.
Precisamente, este traballo e compromiso dun vestiario unido é, segundo Sánchez, a clave para reverter a la mala racha do Dépor ABANCA. “Non imos deixar que isto caia e ese é o principal aspecto ao que temos que aferrarnos, o traballo diario. As futbolistas traballan sen descanso, con ganas e con ilusión. O resto son aspectos que temos que ir modificando, acertando cos mecanismos e xogadoras idóneas para cada partido e todo iso é o que nos vai sacar de aquí. O temos claro”.
Non pensan no descenso
Tras un mes de competición, as branquiazuis seguen a ser colistas, pero para o técnico é inda cedo para falar de posibilidades de descenso. “A decisión da federación de que descendan catro equipos esta tempada ía complicar o obxectivo moito máis, pero nin por asomo estamos a plantexar nada diso. Estamos na sexta xornada do campionato e contamos con que se xogue toda a Liga e estamos traballando para iso. Non e ese o obxectivo”
Manu Sánchez explica que están traballando e probando opcións para dar co mecanismo que finalmente funcione, pero que é un proceso que “necesita tempo para que as xogadoras o asimilen e as novas entendan o que buscamos”. Un tempo que poderán aproveitar ao longo da vindeira semana.
A pausa desta semana vira ben ao equipo, reflexiona Sánchez
O adiamento do partido ante o Rayo Vallecano, inicialmente previsto para o mércores 11 de novembro, vai supoñer unha pausa que o Dépor ABANCA precisa.
“Neste caso nos ven ben, primeiro para tentar recuperar ás xogadoras lesionadas como Cris, como Kenni ou Peke e tratar de desconectar un pouquiño de todos os partidos que disputamos en tan pouco tempo. Estou contento co estado físico do equipo, pero creo que un pouco de pausa, de tempo para analizar, para pensar, para tomar decisións con tranquilidade nos vai vir ben tanto ao copo técnico como ás xogadoras. Para colmo tamén esta semana tivemos a mala noticia da perda de Fran (o adestrador das porteiras) para esta tempada e temos que recompoñer un pouquiño ese traballo semanal e organizarnos ben”, conclúe Manu Sánchez.
