Aínda que veñan mal dadas, elas non se renden. Ás Nosas deportivistas, tal e como aseguraba hoxe en rolda de prensa Manu Sánchez, ninguén lles pode dicir que baixan os brazos. Iso é unha realidade irrefutable.
O técnico coruñés comparecía en sala de prensa logo do partido ante o Real Betis Féminas e explicaba que, na súa opinión, o partido contra as verdibrancas “estivo moi condicionado polos detalles”. Nese sentido o adestrador das deportivistas detallaba ante os medios cuestións como “encaixar no minuto 2 de partido” que “tira ao traste toda a idea do partido”. Tamén apuntou como outro condicionante o feito de “encaixar nun saque desde o curruncho contra un rival que nos estaba facendo dano”.
Segundo explicaba Manu Sánchez, ante as béticas de Amorós, o Dépor ABANCA fixo “un cambio de debuxo” logo de recibir gol. “Tratamos de retocar certas cousas, de ser máis valentes e tiramos cara adiante. Conseguimos facer un gol nos primeiros minutos da segunda metade que cambiaba totalmente o panorama. E despois a desafortunada acción de Villegas, chegou a expulsión e o penalti, xa con dez, aínda que o equipo tentouno até o final… Agradecer o esforzo das xogadoras e pensar no seguinte partido”, destacaba o adestrador galego.
Manu Sánchez: “Con 10 o equipo segue competindo”
No lado negativo, Manu Sánchez explica que o RC Deportivo non está “a ter unha consistencia e un labor de creación boa”. Pero advirte que, así e todo, “estamos a competir todos os partidos“.
Neste sentido, o entrenador deportivista apuntaba na rolda de prensa que o máis importante do partido disputado contra o Real Betis Féminas foi “que con dez e con moitos minutos por diante, o equipo segue competindo e non para e non para. Iso é un aceno de identidade aquí. Ninguén viu nunca un partido do Deportivo ABANCA e que poida dicir que alguén baixase os brazos. Non os baixamos no banco e elas non os baixan no campo. É o máis rescatable e o que nos ten que dar forzas para mirar cara a adiante”.
Consultado sobre se o equipo tería acusado o esforzo desta semana maratoniana de partidos, Manu Sánchez explicaba que non era unha excusa. “Nós acusamos o esforzo, pero tamén o Betis. De feito, terminamos o partido un pouco máis enteiras ca elas, empurrando ata con dez e indo cara arriba. Pero os tres partidos consecutivos para os equipos que os tivemos que asumir foron acuciantes. Os conxuntos que teñen maior profundidade de plantilla son os que mellor poden xestionar este tipo de situacións. Non é o noso caso. Pero non pode ser unha excusa. Penso que non pode haber ningunha excusa que non sexa futbolística para hoxe”, sentenciaba o técnico.
O balón parado
Unha das cousas que lle anda na cabeza a Manu Sánchez para mellorar no plantel branquiazul, son as accións balón parado. Sobre este asunto, explicaba: “ao final é agallas, valentía, atacar o balón. Non hai moito máis. É un córner e remátannos baixo paus. Xa nos fixo un gol así a Real. Insistiremos sobre iso para que non volva suceder”.
A chamada Ley de Murphy está a bater no Dépor ABANCA. O técnico deportivista lamentouse, por exemplo, de que xusto logo de falar con Alba Merino “para que non lle saquen cartón, sácanlle cartón. Tentamos que as xogadoras non se lesionen e algunhas o fan, como é o caso de Lady”.
Manu Sánchez, adestrador do Dépor ABANCA: “O balón parado, ao final é agallas, valentía, atacar o balón. Non hai moito máis. É un córner e remátannos baixo paus. Xa nos fixo un gol así a Real. Insistiremos sobre iso para que non volva suceder”
Sánchez explica que todos estos contratempos, aínda que son “máis inconvenientes dos que contamos”, non deixa de “formar parte do fútbol” e considera que “non poden ser unha escusa”.
En actitude positiva, o adestrador do Dépor ABANCA sentenciaba: “Co que teñamos dispoñible, a pensar no partido de Vallecas”.
