Manu Sánchez, adestrador do Dépor ABANCA, recoñeceu en rolda de prensa que, despois de dous triunfos consecutivos na Primeira Iberdrola, “o estado de ánimo é o que principalmente cambiou”. Explica o técnico que as xogadoras “vense capaces do que realmente son. Nós nunca tivemos dúbidas de que elas fosen capaces de gañar partidos”.
O técnico deportivista subliña que estes dous bos resultados, ante SD Eibar e EDF Logroño, “o que fan é referendar un pouco esa confianza e sobre todo esa autoconfianza. E agora elas ven capaces de algo que fixeron moitísimo”.
Confesa Manu Sánchez que “o que me fai afrontar a semana dunha maneira diferente é velas a elas. Se despois do partido en Eibar vimos bágoas de rabia, de impotencia… este domingo volvemos ver esa alegría típica deste grupo, deste vestiario, esa felicidade, esas caras, esas celebracións dos goles. Iso é o que me dá forzas. Velas outra vez felices dános enerxías, dános ganas”.
Para o preparador deportivista, Manu Sánchez, destaca o papel de dous futbolistas nestes últimos partidos como son Peke e Athenea: “Son dous das principais artífices deste cambio. É todo un conxunto, un bloque que empeza a crer no que fai; pero ao final o que nos estaba faltando era esa contundencia que tiñamos arriba. Elas dous personifican o traballo de todo o equipo”.
Manu Sánchez salienta o traballo que “non se ve tanto”
Non se esquece o adestrador branquiazul de “xente que fai un traballo máis gris, que se cadra non se ve tanto, non resalta tanto como pode ser Alba (Merino), Carolina (Arbelaez). Traballan moito os partidos para que os balóns cheguen en mellores condicións ás dúas dianteiras. Ademais a xente que entra desde o banco está a sumar, e iso é importantísimo, como este domingo Michelle, que revolucionou o ataque; e Rosalía, que nos deu esa tranquilidade que precisabamos co balón”.
Finalmente, advirte que o Madrid CFF, rival este sábado 19 de decembro no campo de Matapiñonera de San Sebastián de los Reyes (13:00 horas), “está nun gran momento de forma, de resultados. Está moi ben traballado, moi ben conjuntado. Está a saírlles todo. Imos tentar porllo difícil e sacar algo positivo para nós”.
