O Dépor ABANCA, que adestra Manu Sánchez, terá o seu primeiro compromiso do ano o vindeiro mastres 5 de xaneiro ás 12:00 (hora peninsular) visitando á UD Granadilla Egatesa Tenerife. Logo do parón polo Nadal, o rendemento do equipo, que amosaba unha recuperación no seu xogo e resultados, é unha dúbida. As branquiazuis terán por diante unha maratón de seis partidos nun mes, o que tamén porá a proba o seu fondo físico. As baixas de Lía Muíños e Kenni deixan á plantilla “algo escasa”, segundo o propio adestrador, polo que a Dirección Deportiva e o corpo técnico non desbotan sumar futbolistas “É un mercado difícil pero estamos a mirar”, di Sánchez.
Manu Sánchez avisaba en rolda de prensa do potencial do UD Granadilla Egatesa Tenerife, próximo rival liga do Deportivo ABANCA. A cita deportiva inaugural do ano para as branquiazuis terá lugar no campo de La Palmera en San Isidro. O adestrador galego apuntaba: “É un equipo moi aguerrido. Colleu moi ben as ideas de Francis Díaz (técnico). Cambiou a política dos últimos anos en canto a estilo de xogo e xa o ano pasado viuse. Terminaron moi ben a tempada. Este ano reforzaron todas esas ideas con algúns reforzos interesantes en todas as liñas”.
Outro dos factores que xogan a favor das futbolistas locais é o tamaño do terreo de xogo. O campo de La Palmera “é de dimensións reducidas”, advirte Manu Sánchez. “Hai que saber xogar neste tipo de campos. Eles lévano a machada. Está a resultarlles”, di o preparador coruñés.
Nesta liña, destacaba Manu o traballo de Francis Díaz, adestrador tinerfeño, e o seu corpo técnico porque “se cadra con non tantos medios como outros clubs están a disputar unha gran tempada. Iremos alí a tratar de traernos algo positivo. Están nese momento da onda na que che vai todo de face, todo ben. Aproveitárono para facer grandísimos resultados, aínda que os últimos non foron tan satisfactorios para eles. É un equipo moi perigoso, moi potente e por algo están aí arriba”.
Manu Sánchez: “Hai incerteza sobre se estaremos ao nivel de antes do parón”
No seu habitual discurso franco, o técnico do RC Deportivo ABANCA confesa ter “incerteza de se imos ser capaces de estar ao mesmo nivel de antes do parón do Nadal. O partido do FC Barcelona (último do ano 2020) non o podemos contar aínda que eu faga autocrítica dese partido tamén para buscar todos os elementos positivos que houbo”.
O partido co Madrid CFF é unha boa pedra de toque das capacidades deste grupo. Ese foi a última saída do Deportivo ABANCA en liga. Se saldouse con empate ante o club madrileña. Para o adestrador branquiazul ese partido é “un gran exemplo que nos ten que servir para ver o que podemos desenvolver fóra de Abegondo e contra rivais cun potencial enorme como é o Madrid CFF, cunha grandísima persoal. E saber sufrir. Creo que soubemos sufrir todo o que tiñamos que sufrir ante as arremetidas delas. E que o equipo vexa que é capaz de estar a recibir as arremetidas do rival, sabendo liquidalas con solvencia. E despois tratar de facer dano, que o fixemos e ben”.
Seis partidos nun mes
O regreso á competición na Liga Iberdrola faise con outro maratón de partidos por diante. Manu Sánchez está á espera de comprobar “a resposta física do equipo. Deses seis partidos que veñen xogamos tres en sete días”, advirte. “Acumúlansenos todos eles e hai que buscar o mellor rendemento do equipo, tanto deportivo como físico, que é o máis preocupante despois do parón”.
Para o adestrador do Dépor ABANCA a estratexia diante desta serie de partidos consecutivos en tan pouco tempo consiste en “tratar de ser positivos, de traballar con cabeza. Non se trata de meternos atracones de traballo e si chegar nas mellores condicións a estes partidos que temos”.
Fichará o Dépor ABANCA?
Nesta volta ao traballo logo do parón da época de Nadal o Dépor ABANCA recupera á guardameta Esther Sullastres, que levaba tempo lesionada. A cancerbeira incorporouse aos adestramentos do grupo e está recuperada ao cento por cento da súa lesión no hombreiro. Polo que o preparador das herculinas, Manu Sánchez, non terá baixas para medirse á UD Granadilla Egatesa Tenerife.
Pero o bloque branquiazul sufriu dúas baixas definitivas para o que queda de tempada coa marcha, xa prevista, de Rosalía Muíños, Lía, que regresa a Estados Unidos. E tamén a de Kenni Thompson. Por ese motivo, o conxunto coruñés non desbota aumentar a plantilla deportivista con novos efectivos.
“Estamos contentos coa plantilla que temos pero pensamos que virían ben reforzos”, explica Manu Sánchez consultado polo tema na rolda de prensa.
Sobre que posto considera que precisa verse reforzado, o técnico non apunta a nada concreto. Explica que “o que precisamos e sumar efectivos á plantilla. Será un plantel escaso logo das últimas saídas. Precisamos non postos, se non máis futbolistas no grupo para aumentar a competencia interna. É un mercado difícil pero estamos a mirar”, confirma.
