O Dépor ABANCA segue vivo e a vitoria acadada ante o CD Santa Teresa da un impulso de enerxía e motivación ao plantel adestrado por Manu Sánchez. Pero aínda queda Liga Iberdrola por diante, e o técnico é cauto á hora de confiarse nas sensacións.
En relación a este trunfo da pasada fin de semana, Sánchez asegurou que as súas pupilas “síntense reforzadas”. Sen dúbida, nesta tempada de “vitorias escasas” o feito de “gañar calquer partido é un subidón de moral e de confianza sobre todo”.
O plan de partido ante o Santa Teresa funcionou á perfección, cun premio dobre, de sumar os tres puntos e facelo ante un rival directo. “Fixemos ben todo o que tiñamos que facer. Fumos moi eficaces nas áreas, que era o que nos estaba faltando”, analiza o adestrador.
Con todo, Manu Sánchez pon os pés na terra: “Xa me encarguei eu de restarlle emotividade ao tema porque mañá (por hoxe, mércores) hai outro partido”. Ao trunfo ante as extremeñas hai que engadirlle que os tres goles marcados suman para o average contra o Santa Teresa, pero o adestrador insiste en que “ao final o importante é gañar”.
Manu Sánchez, adestrador do Dépor ABANCA: “O resultado da máis confianza sobre o traballo que se fai e, sobre todo, para elas e as súas cabezas”
Pero facelo desta forma, cun gran xogo en equipo e efectividade nos ataques, sempre supón un extra. “O resultado da máis confianza sobre o traballo que se fai e, sobre todo, para elas e as súas cabezas”, admite Sánchez.
A meta non cambia e o camiño cara a salvación só pasa por sumar de tres en tres. “Ese é o noso obxectivo de aquí a final de tempada, gañar o próximo partido, esa é a idea”.
O partido ante o Eibar, primeira final?
Ante o discurso habitual en este tipo de situacións, que incide en como o futuro do equipo pasa por superar cada final, Manu Sánchez posiciónase en contra deste tipo de mentalidade.
“Só existe unha final, que é cando ao remate do partido entréganche unha copa ou unha medalla. Esas son as finais. Isto son partidos e temos que ir pensando nos tres puntos que temos en xogo. A partir de aí pensaremos no Betis“, sentencia.
Manu Sánchez, fuxe de considerar os partidos restantes como finais para o Dépor ABANCA: “Só existe unha final, que é cando ao remate do partido entréganche unha copa ou unha medalla. Esas son as finais. Isto son partidos e temos que ir pensando nos tres puntos que temos en xogo”
O rival nesta xornada de entre semana é o SD Eibar, décimo clasificado, e un conxunto que “se amoldou moi ben á categoría. Écapaz de desenrolar distintos esquemas de xogo en virtude do rival e do campo”, analiza o técnico.
Segundo Manu Sánchez, as deportivistas coñecen ben a este rival, polo que “intentaremos competir da mellor maneira posible. (O Eibar) é un equipo valente, aguerrido, que non se amedrenta ante ningún rival. É perigoso nese sentido se vendrá aquí a sacar os tres puntos e non especular. Os equipos de Iker non especulan”, recorda.
Como punto a favor para o Dépor ABANCA está o factor casa. As deportivistas xogarán este mércores en Abegondo, un campo que ás futbolistas e ao adestrados lles gustaría que “como foi sempre seña deste equipo, sexa un fortín. Pelexaremos para que sexa así”. Intentaremos facer valer Abegondo e ver se conseguimos encadear vitorias consecutivas. Iso é o verdadeiro reforzo, o famoso volver a gañar de Aragonés”.
Manu Sánchez aposta pola canteira
Para este tramo final de tempada o Dépor ABANCA non se puido reforzar no mercado de inverno pero, en palabras de Manu Sánchez, “o club dispón de corenta xogadoras”.
A aposta pola canteira é unha constante desde a creación deste conxunto, algo que facilita o traballo do adestrador do Dépor ABANCA B, Kevin. “Desde o primeiro ano hai un número moi alto de xogadoras que debutaron co primeiro equipo”, recorda Sánchez.
Nomes como Eva Dios ou María Figueroa xa son habituais nas rutinas de traballo do cadro da Liga Iberdrola. ” Eva Dios incorporouse á dinámica do primeiro equipo desde a primeira semana porque o gañou na pretempada e agora contamos con María Figueroa“, sinala o técnico.
Malia que o momento actual e a falta de reforzos “obrígame a contar máis co que teño na casa”, Manu Sánchez aclara que “hai que ter coidado con isto. Non hai que subir a xogadoras do B e se sae ben son moi bo adestrador e teño moi bo ollo. Hai que agaradar o momento”. Este foi o caso de Figueroa.
No relativo a esta futbolista, unha das últimas novidades no plantel branquiazul, o adestrador expresou o seu contento co traballo da deportista e declarou que “necesitou desde proceso de chegar aquí, traballar na nosa forma e nas nosas instalacións e ese crecemento como futbolista penso que está á vista de calquera, como Eva ou Carlota o ano pasado”.
Por suposto, o núcleo do equipo segue a estar formado polas xogadoras do equipo profesional, que nas últimas semanas estiveron traballando para dar coa chave que abrise a porta das vitorias.
Un destes cambios afecta a Iris e Ainoa. “Ainoa xa actuou no centro do campo en Valdebebas e é a súa posición natural, é unha pívot defensiva de sempre e iso levouna á Selección”, explica Sánchez. Respecto a Iris, o adestrador explica que xa na súa primeira tempada na máxima categoría xogou moitos partidos como central.
“Cada unha ten as súas características e dannos cousas diferentes. Iris nos aporta velocidade na zaga e Ainoa contundencia nesa segunda liña”, declara o técnico branquiazul.
Tranquilidade ante os cambios na directiva
A noticia que sacudiu a estrutura do club coruñés esta semana foi o cambio na directiva. Algo que afecta de cheo a todos os equipos que conforman o RC Deportivo, pero non preocupa en exceso a Manu Sánchez.
“O que se nos transmite é tranquilidade e que sigamos traballando. A nosa preocupación é o Eibar e o partido deste mércores. Isto son outras esferas que en certa medida non nos incuben directamente. Principalmente o que se nos transmitiu foi tranquilidade e ánimo, e iso sempre é benvido”, declarou neste sentido o adestrador.
