Ao Dépor ABANCA faltoulle nesta xornada contra a Real Sociedad unha das súas grandes características: o gol. Manu Sánchez admitía que se erraron “as ocasións máis claras, incluso un penalti” e sabe que a calquera equipo, iso, “limítao”.
O adestrador das coruñesas é consciente de que a falta dunha pretempada en condicións, por mor da COVID-19, limita a adaptación dos novos efectivos deportivistas. Asume que o equipo, que vén de perder 0-2 na casa coa Real, está “en construción” e amósas seguro de que “o rendemento mellorará”. Apunta como cuestións a corrixir os “mecanismos defensivos” e sinala a segunda parte contra a Real Sociedad como o camiño a seguir: “Aí temos os principios do que temos que conseguir como equipo”, expón.
A ninguén lle gusta chegar á terceira xornada de liga sen puntuar. Ao técnico da Coruña, tampouco. “Está claro que non é o inicio esperado”, admitía en rolda de prensa ao tempo que matizaba que xa contaba “con que ía ser moito máis complicado”. “Gustaríanos ter empezado doutro xeito, pero non puido ser”, recoñecía.
Con todo, o partido da Real e o de Lezama non responden a un mesmo patrón de xogo nas branquiazuis. “Son dúas derrotas con dúas lecturas moi diferentes, temos que traballar sobre iso”, puntualiza o técnico que non quere botar a vista atrás e facer comparacións coa pasada tempada.
“No equipo xa falaramos que non imos facer referencias ao ano pasado. Foi un ano expectacular, irrepetible e por tanto é complexo repetilo. Imos traballar co que temos e co que somos. Hai que pensar xa en Barcelona”, en referencia ao vindeiro partido das galegas co Espanyol.
Explica Manu Sánchez que a competición nesta Primera Iberdrola “creceu moito. Simplemente hai que botar unha ollada aos resultados destas dúas primeiras xornadas. Todo se igualou moito, Todo está moito máis competido, é máis emocionante e tamén máis ilusionante para todas”.
Erros en defensa que minaron ao Dépor na primeira parte
Consultado sobre que lle pasou ao equipo na primeira parte coa defensa? o adestrador non se agacha: “É a miña responsabilidade, non axustamos ben mecanismos defensivos que traballamos esta semana”, asegurou. Sánchez explicaba aos medios que o propio Deportivo “propiciou espazos, balóns que recibían en 3/4 diante da nosa liña defensiva…”.
Defendeu o preparador galego que eses erros “Axustámolo ben e na segunda parte onde xa vimos un Dépor máis real, máis ofensivo, máis á procura da portaría rival e sen conceder ao rival. Arriscamos adiantamos liñas. Puidemos empatar no arranque da segunda parte e non puido ser”.
O conxunto herculino adoece aínda de acoplamento nas novas incorporacións. “Hai moita xogadora nova e estas cousas trabállanse de verdade neste tipo de partidos. Vese o nivel das xogadoras e o que se pode ou non facer. Non tivemos unha pretempada máis axeitada e temos que traballar agora niso”, argumenta Manu.
Abegondo sen #ANosaForza
Se algo se temía animicamente deste grupo era como ía responder ao feito de xogar sen público nas bancadas, unha limitación por mor do protocolo de prevención da COVID-19.
O adestrador da Coruña admitía que no equipo están “moi tristes de que non poidamos contar coa nosa xente. Inflúe porque era un compoñente máis deste equipo. Nos momentos importantes a grada de Abegondo sempre ten unha resposta á altura da situación”.
Con todo, Manu Sánchez avisa: “Pero non pode ser unha excusa. Ao final o partido xógase no campo. Pódese notar no ánimo ou a presión ao rival, pero pode ser unha escusa polo acontecido no campo. Levamos unha derrota, hai que traballar máis e pensar en todo o que temos que arranxar. Esperamos poder ter pronta seareiras nas gradas de Abegondo”.
Un cambio no debuxo que funcionou
Na segunda metade o Dépor ABANCA mudou o seu sistema táctico. O novo debuxo elexido polo corpo técnico, deu resultados. Manu Sánchez explica que “quería fixar ás súas laterais para darlle máis soltura á xente que xoga por dentro. Fixábamos a cobertura defensiva que nos facían as súas laterais e buscábamos máis profundidade pola banda. Xerar máis chegadas, ter máis opcións, non so ter dúas posicións ofensivas se non tres de inicio”.
O preparador branquiazul dixo estar “contento co equipo traballou ben fixo as ocasións necesarias para empatar o partido pero no puido ser”.
Un tipo de xogo ao que as novas incorporacións terán que adaptarse
O Dépor ABANCA ten un “un modelo de xogo moi característico e hai que adaptarse a el”, sinalaba en rolda de prensa o entrenador. “Tras avaliar á plantilla penso que podemos seguir con el, pero con algunhas diferenzas. Hai xogadoras que nos achegan cousas distintas”, matiza.
Na opinión do adestrador, “ás incorporacións vailles custando menos cada vez pero ao non ter unha pretemporada na que estudar todo o que queremos facer. Facémolo no inicio de competición. Estas primeiras xornadas son de construción do equipo. Temos que seguir traballando no axuste destas cousas”.
Para Manu Sánchez é claro que o equipo “mellorará o rendemento”. Explica que está “contento da segunda parte de hoxe. Sobre todo da transferencia da primeira á segunda parte con catro conceptos que axustamos no vestiario cambio a cara do equipo. Ese é o camiño”, apunta
O motivo da falta de gol
Na mente de Manu Sánchez “Non hai unha explicación clara” da falta de pegada das deportivistas. “Unha das características deste equipo é que ten gol. E neste caso erramos as ocasións más claras incluso o penalti e iso limítate. É unha pena por que a Real aproveitou ben as súas ocasións a balón parado e nunha boa xogada que profundizan por banda dereita. A nós costounos pero creo que conseguimos elaborar para entrar na área rival e non fumos quen de aproveitar as ocasións”.
Unha das grandes ausentes no xogo deportivista neste choque foi a goleadora Peke. Sobre ela Sánchez explicaba que foi “a nosa máxima goleadora o ano pasado e arrincou con mala puntería nestas dúas xornadas, hai que traballar”.
Nas claves do partido estivo en non converter un penalti pitado sobre Athenea del Castillo. “Errar unha pena máxima é errar a mellor ocasión que podes ter nun partido. Limítate nas opcións no contexto que estaba o partido cun 0-2”, admite o adestrador que recoñece tamén que o equipo “precisaba dese empurrón. Intres antes tivemos a ocasión Athenea en boca de gol”. Para Manu Sánchez, cúmprese “a máxima do fútbol, se perdoas, págalo”.
Con todo o técnico do RC Deportivo ABANCA incide en que onde o grupo ten que traballar máis non é no ataque senon que hai “o que máis temos que arranxar é mecanismos defensivos”. Explica: “hoxe na liña de catro -en referencia á zaga-, tres das xogadoras eran novas. É onde máis temos que axustar para corrixir problemas.
