O Dépor ABANCA xa non terá a Manu Sánchez como adestrador. O técnico branquiazul deixa o banco coruñés despois de estar á fronte do plantel desde o seu inicio.
O preparador recibiu esta mesma mañá a noticia, despois de pechar os fichaxes do plantel do primeiro equipo. “Preferimos deixar unha semanas para que se pechara o deseño do novo plantel e a incorporación de xogadoras. Os fichaxes deste ano foron realizados por Manu Sánchez e Pablo Pereiro“, explicou Antonio Couceiro, presidente da entidade.
A directiva considera que o Dépor ABANCA carece dun “proxecto de futuro motivador”
Tras cinco tempadas de altibaixos, Manu Sánchez deixa de ser adestrador do Dépor ABANCA por decisión da directiva. Couceiro explicou a motivación desta decisión debido ao novo formato da competición: “Hai importantes decisións que significan un profundo cambio no Dépor ABANCA. Para a próxima tempada preséntase un formato de liga moi complexo. Descenderán 18 dos 32 equipos e ascenderán só dous. Só quedaron dúas xogadoras tras o descenso e houbo que renovar o plantel por completo”, explica.
Ante esta situación, o presidente comunica que “se decidiu construir un novo proxecto de futuro, con novas persoas, camiñando hacia un modelo integrado de xestión”.
A directiva coruñesa non considera que existira “un proxecto de futuro motivador para o equipo feminino, que axude a mellorar a captación e retención das xogadoras”.
Couceiro agradeceulle a Manu Sánchez e Pablo Pereiro “o traballo desenvolto nestes anos”, pero mantén a postura do Consello de Administración, que considera que “ao redor do Dépor ABANCA non se construiu un proxecto de futuro estruturado capaz de soportar as crises que o fútbol xera”.
Nos vindeiros días o club anunciará o nome da persoa que sustituirá a posición de Manu Sánchez e o resto do corpo técnico.
Respecto á sponsorización de ABANCA, o presidente Antonio Couceiro reiterou o apoio da entidade financeira polo equipo feminino.
O ERE no Real Club Deportivo
O presidente tamén falou na rolda de prensa sobre o ERE que está a realizar a entidade coruñesa e que afecta a varias traballadoras e traballadores do club.
Neste sentido, Couceiro insistiu en que este mecanismo é unha ferramenta necesaria “a raíz da existencia de contratos en condicións económicamente totalmente alonxadas da realidade deportiva e económica na que se atopa o club, non só no caso de futbolistas, senón tamén de empregados cuxos salarios poden chegar a ser seis veces máis altos que os dun traballador similar noutro club da mesma categoría”.
O directivo explicou que “esta é a última das medidas que queríamos plantexar, pero é a única que podemos levar a cabo para ter unha boa saída para o Deportivo na situación na que nos atopamos”.
O trámite, iniciado hai dúas semanas, ampliarase durante 15 días máis.
Campaña de abonos
Respecto á campaña de abonos, o presidente anunciou que a mesma dará comezo o vindeiro luns, 26 de xullo, cun prezo dun 20% menos que o custo da última tempada en Segunda División do equipo masculino. Desta maneira, os carnés oscilarán entre os 136 e os 452 euros.
O club do Deportivo comprométese “á devolución en caso de que non se poda asistir a algún dos partidos por cuestións de aforo”.
Durante a súa comparecencia, Couceiro insistiu en que pagar o abono “vai máis aló de ver os partidos do equipo masculino”, xa que dan acceso tamén aos encontros do Dépor ABANCA, así como o Fabril, o xuvenil masculinos.
“Os afeccionados sodes os que vades axudarnos a soster o club, non só no económico, senón no emocional co respaldo nos partidos”, subliñou o presidente.
