O moito se ten falado neste curso 2020-21 das diferencias entre o Dépor ABANCA que adestraba Manu Sánchez do pasado curso con este. As comparacións a el non lle gustan, se cadra por que vivir no pasado non sempre axuda a artellar un mellor futuro. Pero cando se valora unicamente o ano, ninguén pode negar que o 2020 foi un ano fantástico para o primeiro equipo feminino do RC Deportivo. A entidade coruñesa debutaba na máxima categoría e o seu xogo namoraba aló por onde ía. Xogoulle de ti a ti ás grandes escuadras da Liga Iberdrola e os nomes de varias das súas xogadoras reclamábanselle a Jorge Vilda (seleccionador da absoluta feminina estatal), para que recibisen a chamada de La Roja.
Por iso, cando ao adestrador das branquiazuis, Manu Sánchez, se lle pregunta por ese ano, so pode de afirmar con rotundidade: “O balance do ano é bo”. Na súa reflexión, o técnico coruñés incluso chega a ver como algo que fala ben do traballo feito, algo que pon en valor o proxecto deportivista, o feito de que moitas das súas figuras foran fichadas por equipos relevantes ao final da tempada pasada.
“O comezo desta tempada non pode empañar un ano moi bo” di Manu Sánchez
O técnido do Dépor ABANCA teno claro: “O balance deportivo do ano 2020 é bo. Tendo en conta o ano completo é moi bo. Iniciamos e rematamos o ano en Primeira División con tan só catro anos de vida deste proxecto e con momentos inesquencibles. Este comezo da tempada 2020-2021, sendo moi irregular e cun pobre bagaxe de puntos e xogo, non pode empañar o ano completo. A valoración xeral é moi boa”, explica.
No seu análise, Manu Sánchez considera que incluso “a perda de xogadoras importantes, de cara a grandes clubs, é un valor positivo no noso proxecto”. Outra cousa que salienta do pasado curso o adestrador das deportivistas é “a presenza de xogadoras na Selección Absoluta de maneira oficial”, asegura que é “a guinda ao ‘pastel’ do ano”.
Manu Sánchez, entrenador do RCD ABANCA: “A perda de xogadoras importantes, de cara a grandes clubs, é un valor positivo no noso proxecto”
Ademais, outra cuestión que inclúe Manu Sánchez na súa argumentación é que valoración xeral “ten que ser boa tendo en conta tamén o desenrolo do equipo filial. O Depor ABANCA B conta con diferentes xogadoras que van medrando e buscando o seu sitio neste fútbol xa profesional”, afirma con fachenda o adestrador ao falar da canteira branquiazul.
O mellor de 2020, “a comunión coa afección” e o peor: “as consecuencias da pandemia”
O apoio da bancada deportivista en Abegondo chamaba a atención cada vez que alguén visitaba a cancha deportivista o pasado ano por vez primeira. O alento que chegaba ao campo ten levado ás futbolistas case no colo cara á meta rival se as forzas físicas minguaban.
Este ano, a COVID-19, obrigou a ver cemento na grada e incluso a xogar moitos partidos a porta pechada, máis dos desexados por equipo e afeción.
Incluso o soño de volver meter a miles de seareiras en Riazor para ver ao equipo feminino do RC Deportivo viuse freado polo límite de aforo a o que obrigaban as restricións por mor da situación sanitaria. O Dépor ABANCA volveu a desplegar o seu fútbol sobre o tepe do estadio herculino pero as bancadas non tiñan a cor que no partido co Valencia de Copa da Raíña, por exemplo. Un cruce que quedará como un hito na historia branquiazul.
Así, para Manu Sánchez, o mellor de 2020 no Dépor ABANCA, foi precisamente “a confirmación da comunión que se deu entre o equipo e a afección. Esos partidos partidos que todas lembramos con Abegondo cheo, o partido de Copa da Raíña contra o Valencia en Riazor con máis de 8.000 persoas no campo. Esa sensacións non hai gol, campionato, título ou vitoria que supere iso. Foron os momentos máis impresionantes que vivimos este ano”, aseguro o adestrador galego.
“En canto ao peor, penso que foi como nos ten trocado a vida e a vida deportiva esta pandemia”, advirte Manu Sánchez. “Todo o tema dos test, os protocolos, os coidados que temos que ter en cada adestramento… Todo iso foi o peor. Personificado no remate prematuro da tempada pasada no 2020, tiñamos todos unha ilusión de rematar a tempada da mellor maneira posible e truncou ese ano. O peor son estas consecuencias da pandemia”, explica o entrenador do Dépor ABANCA.
Que pide o equipo ao 2021?: “A salvación”
Consultado sobre as arelas para este no que está no seu primeiro mes, o adestrador das branquiazuis apunta a recuperar esa comunión coa bancada. Pídelle a este 2021 “recuperar á nosa afección. Poder ter a nosa xente en Abegondo animando e alentando ao equipo xa que foron partícipes dos momentos máis importantes da historia do proxecto”.
E xa no aspecto deportivo”, como no podía ser doutro xeito o técnico aspira a manter a categoría e seguir entre as mellores do fútbol feminino estatal. “Pedímoslle a salvación nesta tempada. Poder rematar o ano 2021 outra vez na Liga Iberdrola, na Primeira División, que sería un éxito total”.
