O Poio Pescamar segue confiando no seu adestrador, polo que Manu Cossío seguirá á fronte do banco do conxunto conserveiro un ano máis, con opción a outro.
O técnico liderará o corpo técnico das pontevedresas na tempada 2021/2022 despois dos éxitos que está a colleitar no presente curso. Actualmente, as vermellas están a competir por un posto no play-off polo título de campioas da Primeira División, que é a máxima categoría do fútbol sala feminino español.
A traxectoria de Cossío no Poio
O míster Manu Cossío tomou as rendas do primeiro equipo do Poio Pescamar a finais da tempada pasada, collendo o relevo de Raúl Jiménez.
Co comezo deste curso, os resultados comezaron a chegar ao cadro galego, que rematou a primeira fase da competición con só tres derrotas, unha delas ante o Roldán e as outras dúas perdendo co Futsi Atlético.
Finalizando terceiras no Grupo A, as xogadoras do Poio Pescamar dirixidas por Manu Cossío afrontan na segunda fase a loita por un posto nos play offs polo título.
Nesta segunda parte, as vermellas acumulan un empate moi rifado ante o Torreblanca Melilla e unha derrota no duelo galego co Pescados Rubén Burela.
Entre os éxitos desta tempada, inclúese a segunda posición na Copa da Raíña 2020, que disputaron ante as Guerreiras Laranxas. As mariñás foron tamén o rival na Supercopa, de novo con vitoria laranxa.
