“O máis importante é seguir coidando ás xogadoras máis novas e que tanto elas como o club siga crecendo da man”.
“O partido ante o Viaxes Amarelle marcará o nivel dos dous equipos que agora mesmo mandamos na clasificación”.
“Para min é un orgullo ver como siguen saíndo xogadoras da canteira que siguen os pasos das xa coñecidas e contrastadas Vane Sotelo, Iria Saeta, Candela Soria ou Ana Lastra”.
O equipo ourensán do Cidade de As Burgas, adestrado polo técnico Manolo Codeso, está a completar un gran inicio de tempada da división de prata de fútbol sala tras sumar oito vitorias, un empate e unha derrota. As verdibrancas son segundas na táboa clasificatoria e suman 25 puntos dos 30 posibles. Polo momento están a cumprir o obxectivo plantexado que tal e como destaca o adestrador “non é outro que meterse entre os dous primeiros clasificados que son os que dan dereito a xogar os play-off”.
Tras un primeiro partido no que as ourensás caeron na casa ante o FSF Castro por 3 a 7, o equipo foi a máis e puntou nas nove xornadas seguintes, sumando 25 de 27 puntos posibles.
O técnico galego sabe da importancia da canteira para este club e amosa verdadero “orgullo ver como seguen saíndo xogadoras da canteira que seguen os pasos das xa coñecidas e contrastadas Vane Sotelo, Iria Saeta, Candela Soria ou Ana Lastra, entre outras, que xa son xogadoras top no ámbito nacional”.
As Nosas – Que balance fas deste primeiro tramo da tempada tras 10 xornadas de Liga?
Manolo Codeso: O balance é positivo, temos a espiña cravada da primeira xornada onde recibimos unha derrota que non contabamos, pero creo que ao final foi un punto de inflexión para toda a plantilla porque quedou demostrado que esta Liga vai ser dura e cada partido vai ser moi complicado de sacar adiante e de poder puntuar.
Tras esa primeira derrota conseguímos puntuar en 9 xornadas seguidas, con 8 vitorias e 1 empate, polo que poderíase dicir que o balance xeral é de notable.
Manolo Codeso, adestrador do Cidade de As Burgas: “O equipo estivo notable nestos dez primeiros partidos de Liga é o balance xeral é positivo”
A.N.: Segunda posición na táboa e tan só un partido perdido. Cal é o obxectivo do Cidade de As Burgas para esta tempada?
M.C.: O obxectivo desta tempada non é outro que meterse entre os dous primeiros clasificados que son os que dan dereito a xogar os play-off. Despois xa é outra historia e ogallá que poidamos cumprir o obxectivo e poder desfrutar dun play-off que de seguro que será moi emocionante.
A.N.: Ademais, en pouco máis dunha semana o equipo medirase ao Viaxes Amarelle. Equipo imbatido e que suma 10 de 10. Gañar ese partido pode ser un golpe na mesa para as aspiracións do Cidade de As Burgas?
M.C.: A nosa mentalidade agora está en conseguir os tres puntos en Rodiles, un rival e unha pista que sempre é moi complicada. Despois é verdade que nos atopamos ao Amarelle onde seguramente chegará invicto.
Creo que será un partido onde marcará o nivel dos dous equipos que agora mesmo mandamos na clasificación. Para nós é vital sacar o partido adiante, porque supoñería un extra para pelexar pola primeira praza que agora mesmo está a cinco puntos e, de gañar, teriamos a oportunidade de rebaixar esa conta e estar a moi preto do primeiro posto. Por outra banda, tamén sería unha boa forma de demostrarnos a nós mesmas cal é o nivel do equipo.
O que está claro é que temos moitas ganas de que chegue ese partido.
Manolo Codeso destacou que “o partido ante o Viaxes Amarelle marcará o nivel dos dous equipos que agora mesmo mandamos na clasificación”
A.N.: E nas semis de Copa de Galicia con todo por decidir tras perder pola mínima no partido de ida ante un gran equipo como o Poio. Crees que tedes posibilidades de pasar á final nun pavillón sempre complicado como é A Seca?
M.C.: As esperanzas témolas. Na nosa pista xa demostramos que somos un equipo difícil de gañar, onde fixemos un partido moi correcto e deixamos o marcador vivo para ir alí con esperanzas. O que teño claro é que en abril imos a ir á Seca con toda a intención de pasar a eliminatoria e con moita ilusión por facer un gran papel. Temos moito tempo ata que vivamos ese partido e ímolo a preparar a conciencia para tentar chegar á final sabendo sempre que o rival é dos mellores de España.
Codeso: “Se algo caracteriza a este club é a aposta pola base”
A.N.: O teu equipo sempre aposta polo talento da canteira, feito que se demostrou recentemente pola convocatoria de Fara Antolín e Sol Pedrera coa selección Galega sub-19. A aposta pola canteira é o camiño para seguir para crecer como entidade e conseguir obxectivos?
M.C.: Se por algo se caracteriza este club é pola súa aposta pola base. Seguimos traballando nesa liña , agora mesmo Fara e Sol son xogadoras dun gran futuro e temos que ter paciencia e con moito agarimo para que sigan mellorando e progresando pouco a pouco.
Ademais non nos podemos esquecer que este club non ten só dou diamantes, senón que tamén temos grandes xogadoras de moitísima calidade e proxección como Clara, Canolich, Aroa ,Amelia e pisando forte tamén veñen África e Carlota.
Para mín é un orgullo ver como seguen saíndo xogadoras da canteira que seguen os pasos das xa coñecidas e contrastadas Vane Sotelo, Iria Saeta, Candela Soria ou Ana Lastra, entre outras, que xa son xogadoras top no ámbito nacional.
Manolo Codeso: “Fara e Sol son xogadoras dun gran futuro e temos que ter paciencia e con moito agarimo para que sigan mellorando e progresando pouco a pouco”
A.N.: Cal é o propósito de aninovo de Manolo Codeso para o seu Cidade de As Burgas?
M.C.: Agora mesmo o obxectivo número uno é estar entre os dous primeiros clasificados, despois sería un premio grande chegar á final da Copa Xunta, pero o máis importante é seguir coidando ás xogadoras máis novas e que tanto elas como o club siga crecendo da man.
