“O que fan estas deportistas non é nada doado, manterse durante tantos anos na elite supón moitos sacrificios para elas e para todos os membros do club”, aseguraba Manolo Blanco, presidente do Pescados Rubén Burela logo de que o equipo lograra o título de campioas de Copa da Raíña 2022.
Lembran desde o club laraxa que estamos ante unhas xogadoras “que gozan das vantaxes de ser profesionais no seu deporte, certificando que o club ao que pertecen non só é grande dentro da pista, senón tambien fóra dela”. Sosteñen desde o Burela que “estes éxitos, tanto deportivos como sociais, só son posibles grazas aos seus patrocinadores, que sosteñen o club e a esta xeración irrepetible de xogadoras”.
Manolo Blanco pide máis implicación dos “poderes públicos”
En concreto, Manolo Blanco, presidente do Burela FS agradecía “a todos os nosos patrocinadores o seu apoio. Estes títulos son tamén seus. Son tan gañadores como nós”. Puntualizaba, non en tanto o dirixente que o club quere seguir medrando xa que seus rivais contan cada ano con máis orzamento. Así, de cara ao futuro, Manolo Blanco explicaba: “Necesitamos máis implicacion das institucións da Mariña, especialmente dos poderes públicos, que deberían apostar xa de forma definitiva pola igualdade e por estas mozas”.
“Non hai maior escaparate para A Mariña, para dar a coñecer a nosa terra e a nosa cultura en todo o mundo. Este club, e estas mozas, son os mellores embaixadores que unha comunidade podria desexar, e teño a sensación de que nese sentido se esta desaproveitando unha oportunidade”, sostén Manolo Blanco sobre o papel que podería representar o Pescados Rubén Burela en termos de imaxe.
Apuntan desde o club galego que seguirán “loitando cada día por que A Mariña siga sendo un referente mundial do fútbol sala, e as Guerreiras Laranxas, con esforzo e sacrificio, seguro que seguirán traendo alegrías á nosa terra”.
Burela loita polo campionato de Copa 2022 ata os penaltis e acada o título
