- O Concello da Coruña retoma o programa ‘Máis rápidas, máis altas, máis fortes’ co obxectivo de superar o número de sesións en centros de ensino da primeira edición
O Concello da Coruña retoma a partir de hoxe, luns 6 de febreiro de 2023, as actividades do programa ‘Mais rápidas, máis altas, máis fortes’ cunha sesión de práctica de esgrima a cargo do club 100tolos no CEIP Zalaeta.
Con esta iniciativa, o Concello coruñés, a través do grupo Deporte e Muller do Consello Municipal do Deporte, busca achegar á mocidade as diferentes especialidades deportivas practicadas na cidade por mulleres.
Un total de 22 entidades deportivas da cidade colaboran neste proxecto, aportando deportistas, adestradoras, directivas ou árbitras que contan ao alumnado a súa experiencia. Trátase de charlas teórico-prácticas divulgativas nos diferentes centros escolares que participan.
Diversidade de disciplinas no programa “Máis altas, máis rápidas, máis fortes”
Algunhas das modalidades deportivas que forman parte do programa son o atletismo, ximnasia rítmica, patinaxe, piragüismo, petanca, artes marciais, halterofilia, esgrima, montañismo, rugby, fútbol, fútbol gaélico ou deporte adaptado.
Nesta segunda edición, que comezou en novembro, inscribíronse 76 grupos de 25 centros escolares. O obxectivo é superar o número de xornadas levadas a cabo na primeira edición, un total de 25. Ata o mes de maio, diferentes clubs e entidades asistirán a sesións nos centros de ensino.