- Esta será a edición máis internacional do Repsol Eco Rallye A Coruña dado que entre os participantes estarán representadas ata dez nacionalidades diferentes.
- A proba celebrará a súa segunda edición sendo mundialista entre os días 18 e 21 de setembro, percorrendo un total de 39 localidades.
O Repsol Eco Rallye A Coruña pechou onte o prazo de inscricións da súa novena edición con máis de cincuenta pilotos confirmados. A competición afronta xa os últimos preparativos para celebrar, por segundo ano consecutivo, unha cita puntuable para o Campionato Bridgestone FIA Eco Rallye Cup, ademais de formar parte do calendario do Campionato de España de Energias Alternativas RACE. Farao na súa edición máis internacional ata a data, con representación de dez nacionalidades: España, Portugal, República Checa, Italia, Polonia, Francia, Bulgaria e Lituania, entre outras.
A praza de María Pita volverá ser a base de operacións desde a que os equipos participantes no Repsol Eco Rallye A Coruña partirán para percorrer os 574 quilómetros do itinerario deste ano.
O trazado atravesará 39 municipios: 38 da provincia da Coruña e, por primeira vez, tamén Xermade, o que supón a entrada do Repsol Eco Rallye A Coruña na provincia de Lugo.
Outra das grandes novidades é a incorporación de Repsol como patrocinador principal, reforzando así o compromiso da compañía multienergética coa Coruña e co impulso de todas as enerxías.
Ver esta publicación en Instagram
Presentación Repsol Eco Rallye A Coruña
Presentación oficial do evento O vindeiro luns 15 de setembro, ás 12:00 horas, o salón Real do consistorio coruñés acollerá o acto de presentación da 9ª edición do Repsol Eco Rallye A Coruña.
Espérase que a presentación desta nova edición da citada competición conte coa presenza de Roberto García Fernández, xefe de Servizo de Deporte da Coruña na Consellería de Presidencia e Secretaría Xeral; Antonio Leira Piñeiro, deputado provincial; Gonzalo Henrique Castro Prado, concelleiro de Cultura e Turismo da Coruña; Patricia Bello Canedo, concelleira de Cultura e Deportes da Laracha; Manuel Muiño Espasandín, alcalde de Zas; Joaquín Verdegay, secretario xeral da Real Federación Española de Automobilismo; director territorial da zona noroeste de Multienergía de Repsol, Benjamín Muñoz e Javier Losada, representante de Coca-Cola. Ademais tamén asistirán representantes dos concesionarios da cidade.
Durante a presentación daranse a coñecer máis detalles sobre a proba. Cabe lembrar que os pilotos non coñecerán os tramos do rallye ata unha hora antes de afrontalos, o que engade un compoñente extra de emoción e estratexia.
