A cidade da Coruña acollerá este sábado 25 de xullo, a partir das 11.00 horas, a 54ª edición da Travesía ao Dique, unha das citas máis emblemáticas do calendario deportivo coruñés. A proba, organizada polo Club Natación Coruña coa colaboración do Concello, contará coa participación de máis de 200 nadadores e nadadoras das categorías alevín, infantil, júnior, máster e absoluta.
Esta cita deportiva foi presentada esta mañá nun acto celebrado nos exteriores de Marina Coruña, nos peiraos do Náutico, no que participou o concelleiro de Deportes do Concello da Coruña, Manuel Vázquez, acompañado por Raúl Solleiro, presidente do Club Natación Coruña; Ramón Mosquera, secretario xeral da Federación Galega de Natación; Marta Martínez, en representación de Blue Leaders e por Inmaculada Losada e Lucía Méndez, vicepresidenta e responsable de relacións públicas do Club Natación Coruña, respectivamente.
“O mar e o deporte son dous elementos imprescindibles para a identidade coruñesa. Por iso, no Concello da Coruña apostamos por potenciar a nosa participación en eventos como a Travesía ao Dique. Porque nos sitúan nunha posición de referencia nacional e internacional. Sempre imos apostar polas grandes citas deportivas, que son xa un selo desta cidade”, apuntou o concelleiro de Deportes, Manuel Vázquez.
A Travesía ao Dique, puntuable para probas autonómicas e estatais
A Travesía ao Dique conta tamén co apoio da Federación Española de Natación e da Federación Galega de Natación, ao ser puntuable tanto na X Copa de España de Augas Abertas coma no XXII Circuíto Galego de Augas Abertas.
A Travesía ao Dique dará comezo ás 11.00 horas, con saída desde as instalacións de Marina Coruña, e desenvolverase na superficie de auga do porto interior. Están previstas tres quendas de saída:
- Ás 11.00 h, participantes no percorrido de 3.500 metros (categorías absolutas e júnior).
- Ás 11.05 h, participantes máster na proba de 1.200 metros.
- Ás 11.10 h, alevíns e infantís, tamén cun percorrido de 1.200 metros.
Como en edicións anteriores, o percorrido adaptarase á idade e nivel das persoas participantes, garantindo a seguridade en todo momento grazas ao dispositivo coordinado por Bombeiros e o servizo marítimo da Cruz Vermella.
Ademais do Concello da Coruña, a Travesía ao Dique conta co apoio de entidades como Blue Leaders, Softee, Deporte Galego e a Xunta de Galicia.
