A concelleira de Deportes de Santiago de Compostela, Esther Pedrosa, presentou en rolda de prensa a oitava edición da San Silvestre compostelá, na que os participantes deberán correr con máscara e en grupos de 300 persoas por mor das medidas sanitarias para a contención da pandemia. A saída será desde a Avenida de Xoán XXIII e a meta será na Praza do Obradoiro.
O Concello de Santiago, a través do seu departamento de deportes, e a Federación Galega de Atletismo organizan a VIII Edición da Carreira San Silvestre de Santiago de Compostela, que terá lugar o 31 de decembro de 2021 a partir das 17:00 horas da tarde con saída na avenida de Xoan XXIII e chegada á Praza do Obradoiro.
Coa inscrición xa pechada na San Silvestre de Compostela, contabilizáronse un total de 1.170 persoas anotadas que poderán recoller os seus dorsais os días 29,30 e 31 de decembro no Centro Comercial As Cancelas.
A concelleira de Deportes de Santiago de Compostela, Esther Pedrosa. aproveitou a ocasión para “agradecer de antemán á cidadanía de Santiago a súa colaboración no correcto desenvolvemento da carreira”.
Unha San Silvestre con medidas anti-covid
Segundo indicou Iván Sanmartín, delegado en Santiago da Federación Galega de Atletismo, a proba disputarase sobre un circuito de 5 km en ruta homologados pola propia Federación e as marcas pasarán ao ránking galego e nacional na distancia.
Nesta edición de 2021, haberá caixóns de saída segundo a normativa COVID-19 vixente, agrupados en grupos de 300 personas. Os participantes deberán levar a máscara posta durante toda a carreira e o público deberá manter a distancia interpersoal de seguridade de 1,5 metros en todo momento. Publicarase de xeito previo un horario de saídas por caixóns e a composición dos mesmos.
Ademais, tamén recordaron a necesidade de cumprir en todo momento coas recomendacións establecidas no protocolo FÍSICOVID–DXT GALEGO da Federación Galega de Atletismo, así como coas normas de prevención da COVID-19 que establezan as autoridades sanitarias en cada momento.
