A carreira popular da Coruña 10 deixou escenas moi emotivas nas rúas da cidade. Esta era a primeira edición tras o parón obrigado pola pandemia, e significou un paso máis cara a volta á normalidade no deporte. Na liña de meta destacou a imaxe dunha familia, a da psicóloga deportiva Madó González, unida en homenaxe ao seu pai.
Madó e os seus catro irmáns, dous homes e dúas mulleres, coas que formou La Mochila del Deporte, correron os 10km coruñeses unidos para recordar ao seu pai, falecido hai un ano. “Nós entendemos o deporte como unha filosofía de vida”, explica a primoxénita da familia.
‘Somos 7’
Desde que tiña 30 anos, o pai dos González Fernández tiña o costume de saír correr todas as mañás. “Cando traballaba no banco saía correr ás 6 da mañá e todos os días. Aínda que el non era un amante do atletismo e das competicións, si que tiña ese hábito”, recorda Madó.
Madó González: “Temos o lema de que seguimos sendo sete, aínda que el non estea”
Por iso, os cinco irmáns viron na Coruña 10 a oportunidade de renderlle homenaxe. “A verdade é que participamos así en diferentes carreiras ás veces, máis as mulleres que os homes, pero nunca coincidiramos os cinco. O noso pai faleceu o ano pasado e pensamos que sería unha homenaxe correr os cinco xuntos. Fixemos unha camiseta á nosa nai, temos o lema de que seguimos sendo sete, aínda que el non estea“, apunta a psicóloga. “Parecíanos que era unha forma máis de telo presente e sobre todo compartir iso coa nosa nai”, engade.
Correr a Coruña 10 os cinco xuntos “foi unha forma, para nós agora que xa somos maiores, de dicir tamén temos ese hábito, non é a competición nin buscar as marcas, senón o hábito de saír correr, non todos os días, pero si ter ese hábito”.
Da mesma forma, o deporte serviu como ferramenta para superar o loito. “Está demostrado científicamente que o deporte ten moitísimos beneficios, non só a nivel físico, senón tamén a nivel social e psicolóxico. A nós morreunos o noso pai e aos dous días estabamos nun campionato de Galicia cos nosos atletas e os pais dos atletas dicíannos que non tiñamos que vir, que isto non era o importante, pero para nós era o máis importante poder estar aí e retomar dalgunha forma a normalidade, facer a vida normal. Si que axuda, porque a vida continúa e hai que seguir. A nós axudounos moitísimo en todos os sentidos”, exploca a psicóloga.
A familia Gonzalez Fernández tomando parte nunha carreira moi especial para el@s na que a figura do seu pai estivo moi presente. #retos@MadoGlez pic.twitter.com/FuRT1iCPty
— Atletismo Galego (@atletismogalego) October 3, 2021
O deporte máis aló da competición
A figura do pai dos González Fernández estaba tamén moi presente no club que montaron as tres fillas, La Mochila del Deporte, sendo o vicepresidente e coa nai da familia como presidenta. “Eles non tiñan esa vinculación, e dámoslle así o seu protagonismo”, sinala.
Cando naceu este club, “a idea era non crear un club deportivo para competir, que si, que hai competicións, pero que tiña que ser algo máis, que os valores que da o deporte estiveran presentes. Das mulleres que forman parte da Mochila hai moitas que teñen historias de superación. Para nós o deporte é o sacrificio, o esforzo, a superación, sentar exemplo para a rapazada máis xove, que está empezando”, asegura Madó González.
Madó González: “Para nós o deporte é sacrificio, o esforzo, a superación, sentar exemplo para a rapazada máis xove, que está empezando. “
La Mochila volve con forza
Así, ademais de cos González Fernández, La Mochila del Deporte estivo presente na Coruña 10 con preto dunha trintena de deportistas, a maioría delas mulleres. As corredoras acudiron a unha cita moi especial e “moi importante porque había moitísima xente que máis ou menos está adestrando con normalidade. Era a primeira proba que se facía na Coruña, así que dixemos, “Imos participar!” e con moitas ganas de volver a esa normalidade que fai tanta falta”, apunta.
Dos años después, volvimos a abrazarnos en la meta del #C10 #Coruna10 💚💚💚💚💚 #LaMochiladelDeporte Gracias a quienes lo habéis hecho posible 🤗💚 @mmartinez____ @alfhermida @ConcelloCoruna @atletismogalego pic.twitter.com/uXxSGNY89i
— Mar Barcón Sánchez (@marbarcon) October 3, 2021
“Ao cruzar a meta o primeiro que pensei era reto conseguido e agora a esperar a que cheguen os outros tres que faltaban e darnos un abrazo moi forte e abrazar á nosa nai. Iso foi o que se me pasou pola cabeza nese momento”, recorda Madó González.
Ademais de ver aos Marines ENKI, a Coruña 10 deixou estampas como a da familia González Fernández, reunida a través do deporte.
Rocío Alfonso (Marines ENKI): “No deporte estamos completamente normalizados”
