Madó González: “Hai melloría na incorporación da figura da psicóloga no deporte pero queda traballo e máis no feminino”

• A crise sanitaria provocada pola pandemia de COVID-19 evidenciou a necesidade de coidar da saúde mental en todos os ámbitos das nosas vidas, e puxo o foco nunha figura que aínda segue a ser unha gran descoñecida no mundo do deporte pero que é chave para que as deportistas poidan competir en plenas condicións.

Ansiedade ou perda de motivación son algunhas das consecuencias que esta crise sanitaria está a provocar nas deportistas. A chegada da COVID-19 supuxo a cancelación de adestramentos na etapa de confinamento. A volta a unha nova normalidade e a espera para coñecer se se poderían levar a cabo as diferentes competicións, xerou incerteza no mundo do deporte. Os efectos psicolóxicos neste contexto puxeron o foco nunha figura que debería ser imprescindible no eido, pero que aínda é invisible para moitas persoas: as psicólogas e psicólogos deportivos.

A pandemia evidenciou, máis ca nunca, a importancia de coidar da saúde mental coa axuda destas e destes profesionais en todos os ámbitos da sociedade. Aos pés das pistas de atletismo de Elviña, na Coruña, conversamos con Madó González, coordinadora da Comisión Intersectorial de Psicoloxía e Deporte do Colexio Oficial de Psicoloxía de Galicia; membro da Xunta Directiva da División de Psicoloxía da Actividade Física e o Deporte do Consello Xeral de Psicoloxía; e atleta. Unha charla na que a psicóloga deportiva destaca a importancia de adestrar a mente do mesmo xeito que o corpo e de formar e educar a través da actividade física, achegándonos ao seu proxecto La Mochila del Deporte.

– As Nosas: A que nivel cres que está integrada a figura da psicóloga nas diferentes competicións e categorías deportivas femininas en Galicia?

– Madó González: Levo moitísimos anos traballando na psicoloxía do deporte e é certo que vexo que hai mellorías neste sentido, pero aínda nos queda traballo que facer, e máis no caso do deporte feminino, que sempre imos un pouquiño por detrás do masculino.

– A.N: Cres que a crise sanitaria beneficiou esa integración?

– Madó González: Non teño datos concretos. O que si é certo é que de algunha forma se está vendo que a psicoloxía é moi importante non só no deporte, senón en todos os sectores.

– A.N: Cal cres que vai ser o camiño a seguir para incorporar esta figura nos clubs deportivos femininos?

– M.G: Creo que o máis importante é darlle visibilidade, porque nestes momentos máis clubs e federacións deportivas coñecen o papel da psicoloxía do deporte, pero é certo que aínda hai algún descoñecemento. Dar visibilidade, por exemplo, incorporando esa figura nos medios de comunicación e que dalgunha forma vexan que é un profesional como pode ser calquera outro no deporte.

Madó González, psicóloga deportiva: “As deportistas máis de elite que estaban pendentes dos Xogos Olímpicos, o feito de non saber se se ían celebrar, xeráballes moitísima ansiedade”

– A.N: Cales son as principais consecuencias psicolóxicas do confinamento nas deportistas?

– M.G: Depende un pouco do seu nivel. Por exemplo, no caso das deportistas máis de elite que estaban pendentes dos Xogos Olímpicos, o feito de non saber se se ían celebrar, xeráballes moitísima ansiedade. Algunhas outras? Pois moito a nivel de motivación, porque se ti estás na casa sen adestrar ou adestrando nunhas condicións que non son as óptimas vala perdendo. Tamén vemos que o feito de que algunhas competicións non se celebren fai que a motivación vai diminuíndo e, en moitos casos, se abandone a práctica deportiva.

– A.N: Como facedes para atallar esa situación derivada da pandemia?

– M.G: A min gústame traballar co establecemento de obxectivos. É moi importante pensar que estamos nunha situación á que temos que axustarnos, ver as condicións nas que se adestra e tamén o tipo de competicións que hai e intentar adaptarse.

Madó González, psicóloga deportiva: “O feito de que algunhas competicións non se celebren fai que a motivación vai diminuíndo e, en moitos casos, se abandone a práctica deportiva”.