O Club de Béisbol e Sófbol Cambre puxo en marcha unha campaña a prol da igualdade e contra a violencia de xénero. A iniciativa incluíu a elaboración de varias pezas audiovisuais que se publicaron nas redes sociais do club, así como a organización de dous torneos, entre outras iniciativas. Para a súa secretaria e adestradora, María Fernanda Jóver, aínda queda terreo por gañar para acadar unha igualdade real no deporte.
A.N.: Desde o Club de Béisbol e Sófbol Cambre puxestes en marcha unha campaña a favor da igualdade e contra a violencia de xénero, en que consistiu esta campaña e como está funcionando?
MARÍA FERNANDA JÓVER: Desde o primeiro momento cando deseñamos a campaña sabiamos que esta tiña que chegar a todos os compoñentes de club e a todas as categorías. Pensamos en facer a campaña dirixida a todo o club e empregamos as nosas redes sociais como principal impulsor. No deporte, as redes sociais son importantes. Proxectamos unha campaña de publicacións dúas veces á semana. Fixemos vídeos que tiveron un alto impacto e organizamos dous torneos cos que quixemos transmitir os valores da campaña entre os participantes, non só cos membros do noso club, senón tamén con clubs amigos.
No torneo de rapazas colaboramos co Club Helios, cos que creamos unha importante rede de sinerxías. No torneo alevín chamamos ao Lume Béisbol Club, que agora están retomando as categorías inferiores e este evento podíalles servir de impulso.
Creo que a campaña está sendo un éxito total. Sobre todo á hora de darnos visibilidade, xa que moitas entidades deportivas nos felicitaron pola iniciativa: a Federación Galega de Béisbol e Sófbol, a valenciana, a catalá, outros clubs de Galicia… A nosa idea é continuar con este tipo de iniciativas en vindeiras tempadas.
A.N.: Avanzouse en materia de igualdade no deporte nos últimos anos ou aínda queda terreo que conquistar?
MARÍA FERNANDA JÓVER: Desde logo, queda terreo por conquistar. Sobre todo nas oportunidades que teñen os clubs femininos. É moito máis complicado darlle visibilidade a un club feminino, contan con moitos menos apoios e iso supón que custa máis traer adestradoras. Non tes o apoio para dar os pasos que precisas. Creo que todo se basea nunha cuestión de oportunidades.
Os e as deportistas, ao final, son respectados polos seus resultados, deixando a un lado o xénero… pero cando falamos de oportunidades, hai moitas diferenzas. Por desgraza, o retorno dun equipo feminino e un masculino non é o mesmo. Por exemplo, o que aconteceu recentemente no Hockey Club Liceo non debería ter pasado nunca. É incomprensible.
Mª Fernanda Jóver: “Agora mesmo, o 40% do club son mulleres”
A.N.: Diría que hai equidade entre homes e mulleres no Club de Béisbol e Sófbol Cambre?
MARÍA FERNANDA JÓVER: Agora mesmo, o 40% do club son mulleres. Non é equitativo. O sófbol é xa de por si un deporte minoritario comparado co béisbol. É menos coñecidos. Aí é onde temos que traballar, dando a coñecer o sófbol, para rapaces e rapazas.
Queremos que este deporte chegue a todo o mundo, tanto ás persoas que non fan deporte habitualmente como a aquelas que o fan pero están dispostas a coñecer outro deporte.
Desde o club levamos anos apostando polo sófbol feminino, e niso seguimos. Moitas nenas das que están xogando agora na división de honor comezaron con nós sendo só unhas nenas. O sófbol é un deporte que engancha. No caso dos nenos, practican tanto béisbol como sófbol ata a categoría xuvenil. Logo chega o momento de elixir en función das competicións.
A.N.: Reafirman a súa aposta polo sófbol feminino desde os inicios, había xa outros clubs traballando para conseguir este obxectivo cando comezaron?
MARÍA FERNANDA JÓVER: Antes do Club de Béisbol e Sófbol Cambre houbo outros clubs que contaban con equipos de sófbol feminino en Galicia, pero non traballaban con categorías inferiores. Achegar este deporte ás categorías inferiores partiu da Federación Galega de Béisbol e foi cando desde o Club de Béisbol e Sófbol Cambre asumimos ese reto.
Tivemos un grupo boísimo de nenas coas que quedamos subcampioas da categoría xuvenil en España. Lembro que unha vez, falando con adestradores, díxenlles que o meu obxectivo era xogar na división de honor. Víano imposible e, ao final, non só xogamos a división de honor, senón que tamén xogamos na selección nacional. Esa é a liña, seguir crecendo e madurando ao equipo de división de honor, superándonos ano a ano.
A.N.: É secretaria e adestradora do Club de Béisbol e Sófbol Cambre, con que faceta se sinte máis cómoda
MARÍA FERNANDA JÓVER: Gústame máis adestrar. A xestión deportiva gústame, pero moito máis adestrar e preparar ao equipo para competir. As competicións desfrútoas e vívoas moito.
María Fernanda Jóver, secretaria e adestradora no CBS Cambre cóntanos cal é o rol que máis lle presta: “Gústame máis adestrar. A xestión deportiva gústame, pero moito máis adestrar e preparar ao equipo para competir. As competicións desfrútoas e vívoas moito”
