Madrid acolleu o Torneo Nacional San Blas de Loitas Olímpicas no que a Selección Galega obtivo varias medallas pero só un ouro, o de Lydia Pérez. A loitadora do Club de Loita Pontevedra foi a campioa sénior na categoría 62 kg.
En total, o equipo da Fegaloita sumou 10 metais, contando cinco pratas e catro bronces ademais do ouro de Lydia Pérez. Por equipos, o conxunto galego resultou segundo clasificado.
No apartado sénior, Pérez foi a única loitadora feminina. Dentro da categoría cadete, acudiron a Madrid Carmen García, do San Ignacio, e Raquel Brazo, do Kuzushi, ambas medalla de bronce nos seus pesos. Ademais, a tamén cadete Candela Castro, do Atila, chegou á segunda posición dos 57kg.
Xa en idade escolar, Carmen del Mar Naveiro, do Club de Loita de Pontevedra, foi a única loitadora con medalla, colgándose unha prata. Jennifer Fernández, do Kuzushi, tamén competiu neste grupo, rematando na cuarta posición.
A representación da Fegaloita no Torneo Nacional San Blas
| Categoría | Peso | Modalidade | Nome | Club | Resultado |
| Sen/Jun | 70 | LO | Andrés Torres | Pontevedra | 5º |
| Sen/Jun | 86 | LO | Pablo García | Pontevedra | 2º |
| Sen/Jun | 62 | LF | Lydia Pérez | Pontevedra | 1ª |
| Cadete | 55 | LO | Manuel González | San Ignacio | 4º |
| Cadete | 71 | LO | Álex Silva | Keltoi | 3º |
| Cadete | 49 | LF | Carmen García | San Ignacio | 3ª |
| Cadete | 53 | LF | Raquel Bravo | Kuzushi | 3ª |
| Cadete | 57 | LF | Candela Castro | Atila | 2ª |
| Escolar | 48 | LO | Volodymyr Datsenko | Keltoi | 2º |
| Escolar | 52 | LO | Manuel Santiso | Keltoi | 3º |
| Escolar | 68 | LO | Rafael Borrajo | Atila | 2º |
| Escolar | 37 | LF | Carmen del Mar Naveiro | Pontevedra | 2ª |
| Escolar | 50 | LF | Jennifer Fernández | Kuzushi | 4ª |
Ademais das loitadoras e loitadores, acudiron á competición os adestradores Marcos Miragaya, Rubén Méndez e Jacobo Novoa.
