Lydia Pérez adestra coa vista posta en ter un oco nos Xogos Olímpicos de Toquio 2021. Por este motivo, a loitadora pontevedresa atópase xa en Suecia, formando parte da Concentración Internacional, que prepara os Clasificatorios para Toquio.
A galega é a única española que forma parte desta actividade de primeiro nivel dentro do mundo da loita. Tal e como informan desde a Federación Galega de Loita e DA (Fegaloita), Lydia Pérez estará concentrada desde o día 1 e ata o 15 de febreiro.
A financiación obtida pola Fegaloita, pola Federación Española de Luchas Olímpicas y DA e o seu club, fixo posible que a loitadora participe nesta concentración.
Segundo indican na Federación Galega, “os contactos internacionais son moi necesarios, para que nos permitan facilitar os adestramentos de Lydia Pérez. Ela é a única deportista española presente nesta concentración do equipo Sueco, onde está adestrando con numerosas medallistas Europeas, Mundiais e Olímpicas”.
A deportista becada polo CGTD de Pontevedra e adestrada por Marcos Miragaya, puido acceder ao grupo burbulla de adestramento despois de superar os protocolos de test e controles esixidos.
Lydia Pérez irá convocada coa Selección
Ao termo desta actividade, Lydia Pérez viaxará coa Selección Española a Kiev para participar entre o 16 de febreiro e o 1 de marzo noutra concentración e competición internacional.
Ademais destas oportunidades para medrar na súa carreira, a galega ven de ser designada membro da asamblea da Federación Española no estamento de Deportistas.
