A loitadora galega Lydia Pérez repite como sparring do equipo Olímpico Sueco, e formará parte dunha concentración en Helsingborg, entre o 5 e o 20 de xullo. A pontevedresa foi invitada pola propia Federación Sueca de Loitas Olímpicas.
No seu perfil de Instagram, a deportista explicou a súa motivación persoal detrás da decisión de aceptar a invitación. “Por que? Porque quedan tres anos para París 2024, porque queda moito traballo por diante e penso aproveitar todas e cada unha as oportunidades que se me presenten e o máis importante, porque me encanta o que fago. Pode que non vaia estar en Toquio 2021, pero penso loitar por estar en París 2024”, declara contundente.
Ver esta publicación en Instagram
Sofía Mattson, loitadora sueca, si acudirá á gran cita do verán, e para preparala contará coa axuda de Lydia Pérez como sparring. A concentración da que forma parte a galega estenderase ata a data na que o equipo sueco viaxe a Toquio para os Xogos Olímpicos.
Lydia Pérez: “Quedan tres anos para París 2024, porque queda moito traballo por diante e penso aproveitar todas e cada unha as oportunidades que se me presenten”
Segundo indica a Federación Galega de Loita e D.A. (Fegaloita), esta oportunidade “pon en valor o traballo e a relevancia da deportista pontevedresa a nivel internacional. Adestrar coas mellores deportistas do mundo será unha boa formación para o seu futuro máis inmediato”.
Esta non é a primeira vez que Lydia Pérez actúa como sparring en Suecia. Xa o fixera o pasado mes de xuño, cando acompañou á loitadora Sofía Mattson.
Lydia Pérez viaxará a Suecia como ‘sparring’ de Sofía Mattson
