A deportista Lydia Pérez Touriño competiu na categoría de -62 kg no Mundial Absoluto de Loita que se está a celebrar en Belgrado. A galega caeu en primeira rolda nesta competición internacional contra sueca Sara Johanna Lindborg (SWE), por un resultado de 1 – 7.
Tal e como explican desde a Federación Galega de Loita (FEGALOITA) “Este resultado deixaba a Lydia Pérez, pendente de que a deportista sueca chegase á final e non foi así. Sara Johanna Lindborg, caeu na seguinte rolda contra Luisa Helga Niemesch (GER)”.
O lado do cadro de Lydia Pérez, foi o máis duro do peso, pero o seu técnico Marcos Miragaya afirmou tras a competición: “Non caben as escusas, hai que estar en situación de gañar a calquera deportista”. Tamén aseverou Miragaya que no caso da loitadora galega: “Temos moita marxe de mellora”.
“Dúas entradas de Lydia Pérez mal executadas fixérona perder 4 puntos”, explica Miragaya
Destacaba sobre a competición o adestrador Marcos Miragaya o feito de que “Lydia Pérez pasou moito tempo adestrando en Suecia e coñecía moi ben o estilo de Lindborg, mantivo o combate 1-3, ata o último minuto estivo con opcións de gañar, pero dous entradas de Lydia Pérez mal executadas, fíxolle perder 4 puntos”. Aí estaría a chave do resultado final.
En outubro comeza a nova tempada 2022-23 e cada vez falta menos para a gran cita dos Xogos Olímpicos de París 2024. O Campionato do Mundo do ano 2023, será o primeiro torneo clasificatorio para eses XX.OO., o soño de todo deportista.
