Dúas loitadoras galegas estarán no Torneo Internacional Ladys Open de Klippan (Suecia). Trátase de Lydia Pérez Touriño e Nerea Pampín. Na cita deportiva participarán máis de 30 países e terá lugar do 18 ao 19 de febreiro.
Lydia Pérez (Club de Loita Pontevedra) competirá no peso de -62 kg, e Nerea Pampín (Club Keltoi de Vila de Cruces) no peso de -65 kg. Ambas as dúas loitadoras galegas estarán acompañadas polo técnico Rubén Méndez, segundo informa a Federación Galega de Loita (FEGALOITA).
Logo da competición Lydia Pérez e Nerea Pampín permanecerán concentradas en Helsimborg durante unha semana, para preparar o seu seguinte obxectivo que non é outro que a concentración internacional no INSEP de París (Francia), prevista para o mes de marzo.
Este ano a preparación está a ser especialmente dura, xa que o Mundial de setembro será o obxectivo prioritario do curso.
Ambas as dúas deportistas galegas están actualmente ocupando os números 1 e 2 no ránking estatal. Pérez e Pampín son as referentes da Selección Española absoluta femenina de loita.
