A loita galega ten dúas persoas representándoa na primeira cita competitiva que serve para clasificarse para Toquio 2021 (European OG Qualifier). O torneo empeza hoxe en Budapest (Hungría) e alí estarán os deportistas galegos Lydia Pérez Touriño, do Club de Loita Pontevedra e becada no CGTD de Pontevedra, que participará na categoría de -62 kg, e o chairego Jose Cuba Vázquez, do Club de Loita Vilalba, fará o propio na categoría de -125 kg en loita libre olímpica.
A preparación de ambos deportistas, discorre por camiños adaptados a cada un de eles. Lydia Pérez, leva dende finais de xaneiro, participando en numerosas concentracións internacionais: Suecia, Ucrania e finalmente en Budapest, pasando moi pouco tempo en casa.
Pola súa banda, Jose Cuba afina a súa preparación co sparring Sergi Priadun (UKR), no seu club de orixe, conciliando familia, traballo e adestramentos adaptados os seus horarios.
Tal e como informa a Federación Galega de Loita (FEGALOITA) o listón para acadar a clasificación olímpica, pasa por clasificarse en este primeiro torneo para disputar a final de cada unha das categorías de peso: loitar polo ouro ou prata. Todo o que non sexa chegar a final, non serve para acadar a clasificación.
Para seguir os inscritos, a competición en streaming e os resultados finais, está habilitado o seguinte enlace: https://uww.org/event/european-og-qualifier
Lydia Pérez tería outra opción de clasificarse para Toquio 2021 en maio
Este é o primeiro torneo de clasificación Olímpica, o seguinte e último será do 6 ó 9 de maio en Sofía (Bulgaria).
A nota negativa, tal e como traslada a Federación Galega de Loita (FEGALOITA), foi a non participación do suplente Damián Iglesias Vilela (Touro), tras o recente positivo por COVID-19 do titular, para este torneo Taimurad Friev (Baleares). Na última PCR antes de viaxar a Budapest, Friev deu positivo por COVID, pero a inscrición estaba pechada, e non puido participar o deportista Galego, Damián Iglesias, actual campión de España en 86 kg.
