O Pescados Rubén Burela FS contará cunha nova Guerreira Laranxa para o que resta de tempada. Trátase da internacional brasileira Luísa Mayara, que estrease así no fútbol sala español.
Segundo informa o club da Mariña, a ala de 29 anos está xa en terras galegas e será presentada oficialmente pasado o período de illamento domiciliario necesario seguindo o protocolo COVID-19. Tamén están pendentes de finalizar os trámites administrativos precisos.
A futbolista chega procedente do Female Futsal e ten ás súas costas unha ampla e recoñecida traxectoria desde o seu equipo natal, o Blumenau, pasando por Jaraguá do Sul, Brusque, Chapecó ata o italiano Lazio ou Adef de Brasilia.
Luísa Mayara reencontrarase nas filas do Burela con algunhas compañeiras da Canarinha. A brasileira logrou o título de campioa coa súa Selección xogando con Cilene e Cami na Copa América 2019.
“Creo que o Pescados Rubén é un grupo moi forte; sigo a súa traxectoria dende hai tempo”, expresaba a nova incorporación do club galego.
Luísa Mayara: “Sempre crin que era un dos mellores equipos do mundo e agora vén de ser así recoñecido”
A futura 12 laranxa explicou que recala no mellor equipo de futsal a nivel internacional e tricampión esta tempada porque “quería novos retos e experiencias e o Burela é o mellor desafío tanto pola competición como pola súa planificación”.
Neste sentido, Mayara engadiu que “sempre tiven curiosidade por coñecer como era a súa estrutura de traballo; algo xa sabía polas miñas compañeiras da selección. Sempre crin que era un dos mellores equipos do mundo e agora vén de ser así recoñecido”.
A ala confesa que está desexando sumar e “poder ser campioa tamén”, pero primeiro “teño que adaptarme ao cambio horario e despois tocará sobre a pista. Confío en que sexa no menor tempo posible para axudar ao equipo”.
Preguntada sobre que aportará ás Guerreiras Laranxas, a brasileira explica que intentará “sumar sobre todo nos últimos pases, coa miña lectura do xogo de cara á fronte”.
Mayara, nova fichaxe do Pescados Rubén Burela FS: “Sempre tiven curiosidade por coñecer como era a súa estrutura de traballo; algo xa sabía polas miñas compañeiras da selección. Sempre crin que era un dos mellores equipos do mundo e agora vén de ser así recoñecido”.
Con esta fichaxe, xa son dous as novas caras que terá o Burela para os próximos meses. Antes da chegada de Mayara, voleu ás filas laranxas Jane Marques.