A última incorporación das Guerreiras Laranxas, Luísa Mayara da Silva Borges (Blumenau, 1991), xa estará dispoñible para o seu debut como futbolista laranxa esta mesma semana. O Pescados Rubén Burela FS ten un compromiso de liga na Primeira División Feminina do fútbol sala da RFEF o sábado na pista de Xaloc Alacant (19.15 horas).
A internacional brasileira estivo acompañada polo presidente, Manuel Blanco, na súa presentación oficial. A deportista amousouse moi contenta, pero tamén cos nervios lóxicos, ante a gran cita da súa estrea no fútbol sala español.
Luísa Mayara da Silva Borges explicaba sobre o Pescados Rubén Burela FS: “Xa me parecía un equipo moi competitivo e intelixente, pero agora que o comezo a coñecer dende dentro aínda me parece un punto máis. É unha filosofía que se acopla moi ben ao meu xogo, aínda que teño que agardar un pouco máis para adaptación entre Brasil e España”.
A futbolista xoga de ala e chega ao Burela procedente do Female Futsal de Chapecó. Luísa Mayara da Silva Borges trasladaba a súa satisfacción ao respecto da súa inmersión na dinámica do Pescados Rubén Burela despois de tres semanas de adestramentos: “Está sendo paulatina; salvando a diferenza do idioma, estamos no bo camiño, aínda que falta un pouco de fluidez nas xogadas e en toda a conexión co equipo. No entanto, creo que xa vou poder axudar con algunha cousa; tamén hai ansiedade e nerviosismo, algo que lóxico e que tamén axuda a mellorar a unha mesma” explicaba Luísa Mayara.
Mayara, compañeira na Selección do Brasil de Cilene e Cami
No vestiario laranxa non todo é descoñecido para a brasileira Mayara, xa que compartiu o título de campioa na Selección do Brasil con Cilene e Cami na Copa América 2019.
A futbolista declaraba que espera a chegada do sábado e do partido co Xaloc Alacant: “con moitas ganas. Se así o decide Julio (referíndose ao adestrador) eu vou estar dispoñible para dar o máximo”, aseguraba cos ollos brillantes a nova 12 burelista.
