Detrás do xogo que desenvolven as futbolistas xornada tras xornada sobre a pista hai moito traballo diario delas, e tamén de todo o equipo que suma para que o seu rendemento sexa o mellor posible. No Poio Pescamar Luis López-Tulla é a persoa que encabeza o corpo técnico do equipo que este ano militará novamente na Primera División do FSF da RFEF. Con el, moitas máis cabezas e mans aportan para que no 40×20 as vermellas ofrezcan á afección a súa mellor versión.
Presentación do corpo técnico de Primeira División para a vindeira tempada 👩🔧👨🔧⚽️
👉 https://t.co/P18kbLJb4t#PoioPescamar pic.twitter.com/LiKDewACF8
— Poio Pescamar FS (@PoioPescamarfs) August 18, 2023
O primeiro equipo vermello conta con persoal que se encarga da preparación física, da fisioterapia, da psicoloxía deportiva e tamén doutras tarefas como exercer de delegada ou asumir a relación cos medios para dar difusión ao que as deportistas fan sobre a cancha.
Elas, as futbolistas, son as protagonistas, os actores principais de cada cinco contra cinco, pero conseguir que a súa mellor versión sexa posible é froito dos medios e recursos que se colocan á súa disposición. Aí entran en xogo actores e actrices que podemos chamar ‘secundarios’, pero que son absolutamente necesarios para que a película sexa un hit. Canto máis profesional sexa a estrutura, máis posibilidades de éxito haberá.
No Poio Pescamar salientan precisamente que “desde a figura do adestrador á da psicóloga, todos aportan o seu gran de area na consecución dos obxectivos do club”.
No caso da entidade vermella, o staff para a tempada 2023-24 que está a piques de comezar do Poio Pescamar estará conformado polas seguintes persoas:
- Luis López-Tulla: o adestrador madrileño, ós seus 28 anos recén cumpridos, guiará a nave vermella por segunda campaña consecutiva, tras estrearse no posto batendo todos os rexistros históricos do club poiense no seu 25 aniversario.
- Guillermo Arribas: o técnico asturiano, de 32 anos, será o segundo ó mando, en substitución de Kevin Noda que era quen acompañaba a Luis López-Tulla como segundo adestrador o pasado curso.
- David Lázaro: preparador físico de 28 anos que xa se uniu á entidade na recta final do pasado curso. É natural da localidade de Vilagarcía de Arousa.
- Sergio Fandiño: de Beluso, Bueu, levará a cabo nesta tempada 2023-24 as labores de fisioterapeuta, que compaxina co Arosa SC. Ten 24 anos.
- Lidia Martínez: psicóloga, de 28 anos, procedente de Marín.
- Sofía Rodríguez: tras estar de prácticas no club vermello a final da pasada campaña, exercerá agora a labor de delegada do Poio Pescamar. Naceu en Tui hai 22 anos.
- David Maquieira Salgado: pontevedrés afincado en Vilagarcía de Arousa, realizará ,por cuarta tempada seguida, os traballos de prensa e comunicación. Ten 29 anos.
