A dianteira do FC Barcelona, aínda con ficha do filial, debutou onte na Champions League fronte ao París FC, nun encontro no que o conxunto azulgrana pechou o pase aos cuartos de final. Lúa Arufe entrou no último tramo do segundo tempo para substituír á extremo norueguesa Caroline Graham Hansen.
É máis que probable que o nome de Lúa Arufe quedase gravado na mente de todos aqueles que tiveron a oportunidade de vela xogar nas categorías inferiores durante a súa curta pero brillante carreira futbolística.
A atacante galega colleita éxitos na Selección Galega, na Selección Española e agora proxéctase como estrela emerxente no que é considerado por moitos o mellor equipo do mundo: o FC Barcelona.
Nacida en Porto do Son no ano 2008, a relación de Lúa Arufe co deporte é unha auténtica historia de amor, xurdida practicamente dende o berce.
Aínda que comezou xogando ao fútbol, durante un tempo probou sorte no atletismo, disciplina na que tampouco pasou desapercibida e na que chegou a conseguir algunhas medallas.
Durante un tempo, a atacante sonense conseguiu compaxinar ambas as dúas carreiras, pero chegou o momento de elixir e tivo claro que o seu camiño estaba no fútbol. Non se equivocaba. A súa presenza facíase notar sobre o verde dende as categorías base e a súa incidencia no xogo levouna agora a dar pasos firmes cara á elite, baixo a influencia do primeiro equipo do FC Barcelona Femení.
Talento galego no FC Barcelona
Lúa Arufe chegou ao club catalán no ano 2024, procedente do Victoria FC de Santiago de Compostela. Debido a que aínda non cumprira os 16 anos, o FC Barcelona tivo que tramitar a súa ficha no equipo C, aínda que a futbolista galega formaba parte da dinámica do equipo filial do cadro barcelonista.
Para Lúa Arufe, recoñecida seguidora culé, unirse aunha das canteiras máis respectadas do mundo e ter a oportunidade de consolidarse como unha futbolista de referencia, supuxo cumprir un soño, inspirándose día a día nas mellores xogadoras da elite. A atacante sonense asinou un contrato por tres tempadas co FC Barcelona.
Lúa Arufe conta cun contrato con Nike
A fichaxe polo FC Barcelona veu acompañada dun contrato de patrocinio coa marca deportiva Nike, un xesto que sitúa a Lúa Arufe no selecto grupo de deportistas respaldadas por unha das firmas de maior prestixio do mundo do fútbol, que viste a xogadoras de referencia como Alexia Putellas, Naomi Girma ou Patri Guijarro.
Ver esta publicación en Instagram
Salto ao primer equipo
Nunha situación delicada, cunha plantilla curta e baixas que pesan, o conxunto culé recorre ao talento emerxente que se forxa na Masía, dando así a xogadoras coma Lúa Arufe a oportunidade de escribir a súa propia historia dentro do club.
O pasado sábado, a galega foi convocada co primeiro equipo para o partido fronte ao Levante Badalona, que o Barça venceu por 1-5. A atacante galega aínda non desfrutou de minutos en Liga F, pero formar parte da lista de convocadas supuxo un gran paso na súa carreira.
Chamada á elite europea
O pasado martes, Lúa Arufe foi chamada por Pere Romeu, adestrador do cadro catalán, para formar parte do primeiro equipo culé e viaxar a París, onde o FC Barcelona se enfrontou ao París FC, vendendo 0-2 e asegurando o liderado da competición e o pase directo aos cuartos de final da Champions League.
Tratábase dunha cita clave da tempada que Lúa Arufe puido vivir finalmente dende o verde. Con só 17 anos, a galega asinou o seu debut europeo ao substituír nada menos que á ídola culé Caroline Graham Hansen, considerada unha das mellores extremos do panorama actual. Arufe estreouse así nun escenario de máximo nivel, un primeiro paso que todo indica será o inicio dunha carreira destinada a grandes éxitos.
Figura das seleccións galega e española
Lúa Arufe resplandeceu con luz propia na Selección Galega e no combinado estatal, deixando clara a súa pegada dende as categorías inferiores.
Foi subcampioa de España co conxunto galego Sub15, e o seu don innato púidose apreciar tamén na Selección Española, onde cada en partido disputado amosaba o seu potencial.
Coroouse como campioa de Europa Sub17 tras vencer con claridade a Inglaterra por 0-4 en Suecia, unha demostración dos prodixios que asoman entre as novas xeracións.
Ademais, Lúa foi unha peza clave no Mundial Sub17 celebrado este mesmo ano en Marrocos, onde compartiu vestiario con outra galega, a gardameta deportivista Antía Veiga.
Alí caeron en oitavos, na tanda de penaltis fronte a Francia, pero Galicia estivo presente durante todo o torneo.
Ver esta publicación en Instagram
