O presidente da Real Federación Galega de Fútbol, Rafael Louzán, visitou hoxe mércores a provincia de Ourense para comprobar sobre o terreo o estado actual das obras do campo de fútbol de Vilar de Astrés. Ademais, na súa visita, mantivo unha xuntanza coa gran familia da Escola de Fútbol Feminino Rosalía.
O presidente da RFGF visitou en primeiro lugar o estado das obras do campo de fútbol de Vilar de Astrés, unha instalación que, segundo informan desde a Real Federación Galega de Fútbol, “está a ser sometida a unha reforma integral baseada na instalación de céspede artificial, no acondicionamento dos vestiarios e na construción dunha bancada cuberta de catro andares. Cómpre salientar que a Federación fixo e financiou o proxecto construtivo da obra”.
Durante a visita, Rafael Louzán estivo acompañado polo concelleiro de Deportes do Concello de Ourense, Mario Guede; polo arquitecto responsable do proxecto; polo vicepresidente da RFGF, José Manuel Fernández; e polo delegado federativo na cidade das Burgas, Raúl Rois.
Posteriormente, Louzán mantivo unha xuntanza coa Escola de Fútbol Feminino Rosalía, un colectivo que segue medrando campaña tras campaña.
