A Liga Nacional Oro feminina de hoquei liña conta este ano con dous competidores lucenses no grupo 2: o CHL Meigas e o Club Lóstregos de Lugo. O Lóstregos lidera a competición, con dúas vitorias de dous partidos xogados, mentres que o Meigas ocupa a quinta posición tras disputar soamente o derbi lucense da segunda xornada, cun 0-1 en contra.
Non houbo que esperar moito tempo para ver o enfrontamento entre os dous conxuntos lucenses. Na segunda xornada, Meigas e Lóstregos loitaron polos tres puntos, nun encontro que se celebrou o 14 de novembro a porta pechada no Pavillón Daniel Cordido Castro.
O partido estivo moi igualado durante os dous tempos, pero a férrea defensa do Lóstregos, con Lorena Vázquez na portería mantendo o marcadador das rivais a cero, decantou os tres puntos para as visitantes. A isto sumouse unha xogada sobre a bocina que permitiu que Catuxa Castro anotase un gol para o Lóstregos a 53 segundos do final. Cando soamente quedaba un minuto, o equipo dirixido por Javier Bermúdez e Alberto Fernández solicitou un tempo morto para elaborar a xogada que finalizaría no gol da vitoria.
O Lóstregos viña de vencer ao Metropolitano Bilbao na primeira xornada
Por outra banda, o primeiro rival ao que enfrontouse o Lóstregos foi o Metropolitano de Bilbao na súa casa. Este foi o único encontro da xornada non adiado e resultou nun 2-4 a favor das visitantes. As lucenses impuxeron o seu xogo, especialmente grazas ás actuacións de Catarina Castro, cun gol e dúas asistencias; Tamara Iglesias, cun gol e unha asistencia e Raquel Aguirre, con dous goles.
O seguinte encontro que dispute o Lóstregos será contra o CDE Sobre Ruedas, no que será o primeiro partido das lucenses en casa. Pola súa banda, o Meigas deberá viaxar ata Valladolid para enfrontarse ao CPLF Valladolid – Gatas, que ocupa a segunda posición da táboa. Ambas citas celebraranse o próximo 12 de decembro.
