O Campionato de España de Ciclocrós 2026 pechouse este domingo con catro carreiras e en todas elas houbo presenza galega no top-6. O mellor resultado para Galicia na clausura do evento celebrado en Tarancón (Cuenca) rubricouno a marinense Lorena Patiño. A ciclista obtivo o seu cuarto título consecutivo nesta modalidade, o primeiro na categoría Sub-23, e outorgoulle á Selección Galega unha segunda medalla de ouro despois da conquistada na véspera polo cadete Pedro Cidrás, tamén veciño de Marín.
Campioa de España cadete no 2023 en Vic e júnior tanto no 2024 en Amurrio como no 2025 nas Pontes, a ciclista da estrutura Misser Project confirmou na súa estrea como sub-23 que o futuro do ciclocrós feminino español está nas súas pernas. Ademais de acadar a coroa da súa categoría, Lorena Patiño asinou a cuarta praza na clasificación absoluta a 47 segundos de Sofia Rodríguez (Nesta-MMR), a gañadora elite no rápido trazado conquense. Un excepcional rendemento ao que non lle afectou nin un contratempo mecánico, segundo informa a Federación Ciclismo Galego.
Así foi a carreira de Lorena Patiño
O termómetro marcaba 1°C cando se deu a saída no circuíto da Ermita de la Virgen de Riánsares. Antes de rematar a primeira das seis voltas, a representante da Selección Galega adiantou a Marta Beti (Cantabria) e situouse como primeira sub-23. A progresión de Lorena Patiño non quedou aí.
Despois de soltar á súa acompañante, reduciu ao mínimo a desvantaxe coa terceira e a cuarta elite, pero xusto cando ía contactar con Sara Cueto (Unicaja Gijón) e Alicia González (Nesta-MMR) saíuselle a cadea.
A galega tivo que baixarse da bicicleta para arranxar a avaría. Durante ese momento de tensión non perdeu ningún posto e no seguinte parcial superou a Alicia González.
Rodando en solitario como cuarta clasificada, a líder sub-23 moveuse en tempos similares ás tres primeiras e a última volta iniciouna a 25 segundos da cabeza de carreira. Nese xiro final lanzou o seu ataque por diante a valenciana Sofía Rodríguez, que logrou revalidar o título elite con 16” de marxe respecto á asturiana Lucía González (Nesta-MMR). Patiño, que cruzou a liña de meta a 16” de Sara Cueto, avantaxou en 54” á segunda sub-23, a Ana López (Aragón).
Pola súa banda, a elite galega Irene Trabazo, a outra corredora da Selección Galega nesta proba, finalizou sétima na súa categoría e 12ª na táboa absoluta.
“Non é un dos circuítos que mellor se me adapten, eu son de circuítos máis duros e este é máis ‘ratonero’. Viña dunha molestia, que sigo tendo, e non sabía como me ía atopar. A verdade, que non podo pedir máis.
“Na segunda volta achegueime bastante ás elites, pero desafortunadamente saíuseme a cadea. Tiven un momento de nervos, non sabía a canto viñan as sub-23, pero puiden poñela rápido e puiden coller a Alicia González. Para coller á terceira xa non me deu”, comentou Lorena Patiño, que xa se marca un novo obxectivo: “Facelo moi ben na Copa do Mundo de Benidorm”.
Lorena Patiño: “Na segunda volta achegueime bastante ás elites, pero desafortunadamente saíuseme a cadea. Tiven un momento de nervos, non sabía a canto viñan as sub-23, pero puiden poñela rápido e puiden coller a Alicia González. Para coller á terceira xa non me deu”
Miguel Rodríguez, quinto
Outro galego que esta temporada subiu de categoría estivo entre os mellores na carreira elite masculina. Miguel Rodríguez (Supermercados Froiz), campión sub-23 o ano pasado nas Pontes, realizou unha gran saída e conduciu o pelotón durante boa parte da primeira volta.
A partir de aí, lanzou a súa ofensiva o valenciano Felipe Orts (Ridley) para proclamarse campión por oitava vez na carreira raíña e o ponteareán moveuse entre a cuarta e a oitava posición.
Aos últimos metros chegou formando parte dun trío que se xogou a ‘medalla de chocolate’. Nun esprint de ‘photo finish’, impúxose o cántabro Ismael Esteban (Logos Energía-BH) por diante do galego, que concluíu quinto. Xunto a eles entrou Miguel Díaz (Madrid).
Samuel González, coas cores de Galicia, meteuse entre os dez primeiros ao terminar décimo. O maillot do conxunto autonómico tamén o defendeu Borja Gómez, un ano máis exercendo de capitán da Selección de Breogán e dando unha lección de inclusión.
Dous sextos postos
A derradeira xornada en Tarancón comezou co circuíto xeado e cun dobre sexto posto do combinado dirixido polo seleccionador José Alberto del Río nas probas para juniores. Alejandra Neira quedouse a 38” do podio nunha carreira que Xiana Seijo completou na 13ª posición.
En canto aos mozos, Marcos Rodríguez encabezou a actuación galega, a 1’ do bronce, mentres que José Manuel Pintos e Lucas Lozano ocuparon a 19ª e a 37ª praza. Entre eles finalizou Pedro Liaño (Cortizo), 24º, e o seu compañeiro de equipo Xián Rodríguez clasificouse 40º.
Despois de tres días de competición, o noso ciclocrós regresou de territorio castelamanchego con catro medallas. A Selección Galega conseguiu os títulos sub-23 feminino e o cadete masculino, así como co bronce cadete masculino. Ao podio tamén subiu Marina González, corredora do Supermercados Froiz, como subcampioa Máster-40B.
